Ռուսաստանի ՊՆ-ն Թուրքիային մեղադրել է միջազգային իրավունքը խախտելու մեջ

13:38, 04 Մարտ 2020

Ռուսաստանի ՊՆ-ն Թուրքիային մեղադրել է միջազգային իրավունքը խախտելու մեջ

Ռուսաստանի պաշտպանության նախարարությունը հայտարարություն է տարածել, որտեղ Թուրքիային մեղադրել է միջազգային իրավունքի խախտման մեջ: Որպես հիմնավորում Ռուսաստանը նշում է այն փաստը, որ Թուրքիան վերջին շրջանում կտրուկ ավելացրել է իր զորքի ու զինտեխնիկայի թիվն Իդլիբում, որը համարվում է ապառազմականացված գոտի:

Ռուսական կողմի հայտարարության մեջ նշվում է նաև, որ ահաբեկչական խմբավորումները դիրքավորվել են Թուրքիայի իդլիբյան դիտակետերում և արդեն հաճախակի հարձակումներ են կազմակերպում ռուսական ավիաբազայի ուղղությամբ:

Նշենք, որ Սիրիայի Իդլիբ նահանգում իրավիճակը շարունակում է ծայրահեղ լարված մնալ. տեղի են ունենում բախումներ մի կողմից սիրիական կառավարական բանակի և մյուս կողմից թուրքական բանակային ստորաբաժանումների ու Անկարայի հովանավորությունը վայելող զինված խմբավորումների միջև:

Հիշեցնենք, որ Իդլիբում տեղի ունեցող զարգացումները քննարկելու ու հնարավոր հրադադարի պայմանների մասին բանակցություններ վարելու նպատակով մարտի 5-ին Մոսկվայում կհանդիպեն Ռուսաստանի ու Թուրքիայի նախագահներ Վլադիմիր Պուտինն ու Ռեջեփ Թայիփ Էրդողանը:

Աղբյուր` Ermenihaber.am