Թուրքիայում ընդդիմադիր գործիչները ծաղրել են սոցցանցերը վերահսկելու մասին Էրդողանի հայտարարությունը

Քաղաքական14:00, 06 Հուլիս 2020

Թուրքիայում ընդդիմադիր գործիչները ծաղրել են սոցցանցերը վերահսկելու մասին Էրդողանի հայտարարությունը

Թուրքիայում ընդդիմադիր գործիչները միացել են սոցցանցերի նկատմամբ պետական վերահսկողություն սահմանելու իշխանությունների մտադրությունը քննադատող օգտատերերի արշավին։

Մասնավորապես «İyi» կուսակցության նախագահ Մերալ Աքշեները #SosyalMedyayaDokunma («Սոցիալական մեդիային մի դիպչիր») հեշթագով Twitter-ում կատարված գրառմամբ հեգնել է իշխանությունների այդ նախաձեռնությունը։ «Այ սա է հեռանկարը, այ սա է խելքը, այ սա է մարտավարությունը», - նշել է նա։ Մեկ այլ գրառմամբ Աքշեները նշել է Էրդողանին ու գրել․ «Եթե մինչև «Dark»-ի վերջին եթերաշրջանի ավարտը «Netflix»-ը փակես, հավատա, կնեղանամ»։

Ընդդիմադիր «Ժողովրդահանրապետական» կուսակցության (ԺՀԿ-CHP) նախագահ Քեմալ Քըլըչդարօղլուն էլ իր հերթին է կիսվել Աքշեների գրառմամբ՝ հավելելով․ «Աման, տիկին Մերալ, հիմա բարկությունից սփոյլեր թույլ կտա»։

Իսկ քրդամետ «Ժողովուրդների դեմոկրատական» կուսակցության (ԺԴԿ-HDP) նախագահ Փերվին Բուլդանը կիսվել է Քըլըչդարօղլուի հրապարակմամբ ու մեկնաբանել հետևյալ կերպ․ «Մենք էլ «La Casa de Papel»-ի վերջին եթերաշրջանին էինք սպասում»։

Ավելի վաղ սոցիալական ցանցերի վերաբերյալ Էրդողանի հայտարարության դեմ իրենց բողոքն էին արտահայտել հազարավոր օգտատերեր՝ հրապարակումներ կատարելով #SosyalMedyayaDokunma հեշթագով։

Հիշեցնենք, որ Թուրքիայի նախագահ Ռեջեփ Թայիփ Էրդողանը օրեր առաջ հայտարարել էր, թե այսուհետ բոլոր սոցցանցերի գործունեությունը երկրում վերահսկվելու են մեջլիսում ընդունվելիք նոր օրենքներով։ Էրդողանի ելույթից հետո նրա գլխավորած իշխող «Արդարություն և զարգացում» կուսակցության (AKP-ԱԶԿ) պատգամավորներն անմիջապես ձեռնամուխ են եղել սոցցանցերի գործունեությունը խիստ վերահսկողության տակ առնող օրենքի փաթեթի մշակմանը։ Նոր օրենքներով հսկողության մեխանիզմներ են սահմանվելու նաև Netflix, Amazon Prime, Puhu TV, Blu TV հարթակների համար։

Աղբյուր` siyasihaber.org