Զեկույց․ Թուրքիայում լրագրությունը ասոցացվում է ահաբեկչության հետ

Իրավական12:33, 10 Հուլիս 2020

Զեկույց․ Թուրքիայում լրագրությունը ասոցացվում է ահաբեկչության հետ

Թուրքիայում գործող «Մամուլի և իրավական աշխատանքների միությունը» (MLSA) «Մամուլի միջազգային ինստիտուտի» (IPI) հետ համագործակցությամբ 13 ամսում հետևել է լրագրողների դեմ հարուցված 169 դատական գործի ընթացքին և համապատասխան զեկույց հրապարակել։ Նախաձեռնության մասնակից 19 դիտորդները 2019թ․ փետրվարի 26-ից մինչև 2020թ․ մարտի 6-ը Թուրքիայի 15 նահանգներում մասնակցել են 319 դատական նիստի։

Ըստ այդմ՝ որոշակի պատիժ ստացող լրագրողների 78 տոկոսը մեղադրվում է ահաբեկչության հետ կապի մեջ։ Իսկ նման դատական գործերի 74 տոկոսի դեպքում լրագրողների դեմ որպես ապացույց են օգտագործվում նրանց լրագրողական գործունեության շրջանակներում կատարված գործողությունները։

Զեկույցում արձանագրվել է, որ լրագրողների դեմ տարվող դատավարությունները անարդար են, իսկ բացարձակապես խոսքի ազատության շրջանակներում տեղավորվող նրանց հայտարարություններն ու հեղինակած լուրերը ահաբեկչության հետ կապի մեղադրանքով պատիժների ու խոշոր տուգանքների պատճառ են դառնում։

MLSA տնօրեն Վեյսել Օքը նշել է, որ Թուրքիայում լրագրությունը շարունակաբար կապվում է ահաբեկչության հետ։ «Այդ դատական գործերի մեծ մասի հիմնական ապացույցները լրագրողների՝ սոցիալական ցանցերում արված հրապարակումներ են, լուրերը, հոդվածները կամ հեռուստահաղորդումները։ Եվ իսկապես չափազանց փոքր է այն դատական գործերի թիվը, որոնք ավարտվում են մեղադրյալի արդարացմամբ», - նշել է Օքը։

Նա հիշեցրել է, որ Թուրքիան դեռևս շարունակում է մնալ մեկն այն երկրներից, որտեղ ազատազրկված լրագրողների թիվն ամենից մեծն է։ Երկրում խախտվում են արդար դատավարության սկզբունքները, դատավորները չեն ենթարկվում միջազգային իրավունքի նորմերին և երկրի Սահմանադրության պահանջներին։

Կազմակերպությունը պատրաստվում է իր զեկույցը ներկայացանել նաև Թուրքիայի արդարադատության նախարարությանն ու միջազգային կառույցներին։

Աղբյուր` gazeteduvar.com.tr

Այս ենթաբաժնի վերջին նորությունները

11:59, 22 նոյ

Թուրքիան ներառված չէ այն երկրների ցանկում, որտեղ Իսրայելի վարչապետը չի կարող մեկնել

Միջազգային քրեական դատարանն Իսրայելի վարչապետին և նախկին պաշտպանության նախարարին «պատերազմական հանցագործության» մեղադրանքով ձերբակալելու որոշում էկայացրել։

13:07, 20 նոյ

ԱՄՆ-ն պատժամիջոցներ է սահմանել Թուրքիայում գտնվող ՀԱՄԱՍ-ի անդամների դեմ

ԱՄՆ-ի ֆինանսների նախարարությունը հրապարակել է Պաղեստինի Գազայի հատվածում իշխող «ՀԱՄԱՍ» խմբավորման անդամների նոր ցուցակ, ովքեր հայտնվել են պատժամիջոցների տակ։