Էրդողանի կուսակցության խոսնակն արձագանքել է հայ-ադրբեջանական սահմանի ռազմական միջադեպին

Քաղաքական14:49, 13 Հուլիս 2020

Էրդողանի կուսակցության խոսնակն արձագանքել է հայ-ադրբեջանական սահմանի ռազմական միջադեպին

Թուրքիայում իշխող և նախագահ Ռեջեփ Թայիփ Էրդողանի գլխավորած «Արդարություն և զարգացում» կուսակցության (ԱԶԿ-AKP) մամուլի քարտուղար Օմեր Չելիքը հանդես է եկել ՀՀ զինված ուժերի գործողությունները դատապարտող հայտարարությամբ։

«Twitter» միկրոբլոգի իր էջում Չելիքը այդ մասին գրառում է արել՝ նշելով հետևյալը. «Մենք խստիվ դատապարտում ենք Հայաստանի ագրեսիան մեր Ադրբեջանի նկատմամբ։ Հայաստանը թող վստահ լինի, որ դա չի մնալու անպատասխան»։

Նա իր գրառումն ավարտել է այն հավաստիացումով, որ Թուրքիան ցանկացած ժամանակ, ցանկացած պայմաններում Ադրբեջանի կողքին է։

Հիշեցնենք, որ հւլիսի 12-ին՝ 12:30-ի սահմաններում, Ադրբեջանի զինված ուժերի զինծառայողները, УАЗ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են կատարել: Հայկական կողմի նախազգուշացումից հետո Ադրբեջանի զինծառայողները, թողնելով УАЗ մակնիշի ավտոմեքենան, վերադարձել են իրենց դիրք: Ժամը 13:45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը, կիրառելով հրետանային կրակ, սակայն ճնշվել են հայկական կողմից և կորուստներ կրելով հետ շպրտվել:

Ավելի ուշ հայտնի դարձավ, որ ադրբեջանական կողմը վերսկսել է Տավուշի դիրքերի ուղղությամբ։

Նշենք. որ հուլիսի 10-ին Հայաստանի անվտանգության խորհուրդը հրապարակել էր ՀՀ ազգային անվտանգության ռազմավարությունը, որի մեջ նշվում էր, որ «Թուրքիան կդադարի անվտանգության սպառնալիք լինել ՀՀ համար, երբ վերանայի Հայաստանի և հայ ժողովրդի հանդեպ իր ոչ բարիդրացիական քաղաքականությունը»: