Թուրքիայի պաշտպանության նախարարը հայտարարում է, որ թուրքերն ու քրդերը եղբայրներ են

Հասարակական15:25, 15 Դեկտեմբեր 2021

Թուրքիայի պաշտպանության նախարարը հայտարարում է, որ թուրքերն ու քրդերը եղբայրներ են

Թուրքիայի պաշտպանության նախարար, զինվորական կոչումով բանակի գեներալ Հուլուսի Աքարը ելույթ է ունեցել Բաթմանում առևտրաարդյունաբերական պալատի նոր մասնաշենքի բացման ժամանակ։

Նախարարը խոսել է քրդերի հետ ունեցած խնդիրներից։ Նա մասնավորապես հայտարարել է, որ թուրքերն ու քրդերը եղբայրներ են։

«Բոլոր նրանք, ովքեր ցանկանում են թուրքերի ու քրդերի միջև խռովություն առաջացնել, հաջողության չեն հասնելու ոչ այսօր, ոչ էլ վաղը, ինչպես որ չեն հաջողել նախկինում»։

Ըստ Հուլուսի Աքարի՝ քրդական կառույցներից «Քուրդիստանի բանվորական կուսակցությունը (ՔԲԿ-PKK) և «Ժողովրդական պաշտպանության ուժերը» (ԺՊՈւ-YPG) չեն կարող լինել «իրենց քուրդ եղբայրների» ներկայացուցիչը, ինչպես օրինակ «Իսլամական պետություն» ահաբեկչական կազմակերպությունը չի կարող ներկայացնել մուսուլմաններին։

«Թուրքերը և քրդերը եղբայրներ են։ Դարեր շարունակ մենք նույն հաց ու ջուրն ենք կիսում»,- շեշտել է քրդերի դեմ մի շարք ռազմական օպերացիաներ իրականացրած Թուրքիայի պաշտպանության նախարարը։

Նշենք, որ Թուրքիայում իշխող «Արդարություն և զարգացում» կուսակցությունը (ԱԶԿ-AKP) ի սկզբանե հանրությանը հրամցնում է թուրք-քրդական եղբայրության մասին թեզը, որով փորձում է մեկընդմիշտ փակել քրդական հարցը, ինչպես նաև ստանալ քրդերի աջակցությունն ընտրություններում։

Վերջերս Թուրքիայի նախագահ Ռեջեփ Թայիփ Էրդողանը Բաթմանի նահանգում երիտասարդների հետ «Քուրդիստանին» առնչվող երգ էր երգում, ինչը թուրքական մամուլում լայն քննարկման թեմա էր դարձել։ Պատճառն այն էր, որ այդ օրերին Էրդողանի կոալիցիոն գործընկեր «Ազգայնական շարժում» (ԱՇԿ-MHP) կուսակցության առաջնորդ Դևլեթ Բահչելին Սղերթում կոպտել էր «Քուրդիստան» բառն օգտագործած մի արհեստավորի և նշել, որ հարկ եղած դեպքում իրենք կնահատակվեն, սակայն թույլ չեն տա, որ Թուրքիայում Քուրդիստան ստեղծվի։

Աղբյուր` TRT haber