Էրդողանը կարևորել է Իսրայելի հետ վերաակտիվացող երկխոսությունը

Քաղաքական15:33, 23 Դեկտեմբեր 2021

Էրդողանը կարևորել է Իսրայելի հետ վերաակտիվացող երկխոսությունը

Թուրքիայի նախագահ Ռեջեփ Թայիփ Էրդողանը կարևորում է Իսրայելի նախագահի և վարչապետի հետ նորից ակտիվացող երկխոսությունը Երուսաղեմի և Պաղեստինի հարցում կատարվելիք քայլերի տեսանկյունից։

Այս մասին Էրդողանը հայտարարել է Թուրքիայի հրեական համայնքի և իսլամական երկրների ռաբբիների դաշինքի անդամների հետ հանդիպմանը։

«Իսրայելի կառավարությանն ուղղված մեր նախազգուշացումները հարցերին Մերձավոր Արևելքի երկարաժամկետ խաղաղության և կայունության տեսանկյունից մտեցում ապահովելու համար են․․․ Չնայած Պաղեստինի հարցում մեր մոտեցումների տարբերությանը՝ մեր հարաբերությունները յուրովի զարգանում են Իսրայելի հետ տնտեսության, առևտրի և տուրիզմի ոլորտներում»,-նշել է Թուրքիայի նախագահը։

Հիշեցնենք, որ թուրք-իսրայելական հարաբերությունները կտրուկ վատթարացել էին 2010 թվականի մայիսի 31-ին Գազայի հատված մեկնող «Ազատության տորմիղի» միջադեպից հետո, երբ իսրայելցի հատուկջոկատայինները տորմիղի դրոշակակիր թուրքական «Մավի Մարմարա» նավում սպանեցին 9 թուրքի (2014թ. մահացավ նաև միջադեպի ժամանակ ծանր վիրավորվածներից մեկը)։ Միջադեպից հետո Թուրքիան 3 նախապայման ներկայացրեց Իսրայելին` ներողություն խնդրել, փոխհատուցում վճարել և վերացնել Գազայի հատվածի շրջափակումը՝ ընդգծելով, որ առանց այդ 3 կետի իրագործման թուրք-իսրայելական հարաբերությունների կարգավորում տեղի չի ունենա:

Ավելի ուշ՝ 2018 թվականին, երկու երկրները հետ կանչեցին իրենց դեսպաններին այն բանից հետո, երբ արաբական աշխարհում և նաև Թուրքիայում լուրջ դժգոհություն էր առաջացրել ԱՄՆ նախագահ Դոնալդ Թրամփի որոշումը Երուսաղեմը որպես Իսրայելի մայրաքաղաք ճանաչելու մասին։ Այդպիսով երկկողմ դիվանագիտական հարաբերություններն իջեցվեց գործերի ժամանակավոր հավատարմատարի մակարդակի։

Աղբյուր` TRT haber