ERMENI HABER AJANSI

Թուրք վերլուծաբան Մուսթաֆա Քարաալիօղլուն Ռուսաստանի և Թուրքիայի միջև հարաբերությունների հեռանկարին վերաբերող իր հոդվածում նշել է, որ քանի դեռ Ռուսաստանի ներխուժումն Ուկրաինա շարունակվում է, անորոշությունն աճում է թե՛ պատերազմի նպատակակետի և թե՛ մասշտաբների առումով:

Ըստ նրա՝ անկախ պատերազմի ելքից, Թուրքիան այլևս չի կարող նախկինի պես խանդավառ և ասիմետրիկ հարաբերություններ պահպանել Ռուսաստանի հետ:

Հոդվածի հեղինակը նշել է նաև, որ պատերազմից հետո Մոսկվան կլինի մեկուսացված և ինքնաբավ: Թուրքիայի քաղաքականությունը միտված է երկու կողմերին էլ չվիրավորելուն։ Եվ դա, ըստ Քարաալիօղլուի, ճիշտ քաղաքականություն է, այլ տարբերակ չկա։ Բայց պատերազմից կամ խաղաղությունից հետո Թուրքիան այլևս չի կարող նախկինի պես խանդավառ և ասիմետրիկ հարաբերություններ պահպանել Ռուսաստանի հետ, որովհետև հիմա կա հսկայական ուկրաինական ճգնաժամ:

«Թուրքիան չի կարող մասնակցել ԱՄՆ-ի և Եվրոպայի պատժամիջոցներին իր տնտեսական կարողությունների սահմանափակության և վերջին շրջանում արձանագրվող ճգնաժամի պատճառով: Եթե անգամ հնարավորություններ էլ ունենա, չի կարելի խրախուսել նրա մասնակցությունը պատժամիջոցներին»:

Այնուամենայնիվ, ըստ Քարաալիօղլուի, Թուրքիան պետք է հավասարակշռի Ռուսաստանի հետ արտաքին առևտուրը, որը հատկապես էներգակիրներով պայմանանավորված դարձել է միակողմանի: Թուրքիան հինգերորդ երկիրն է ռուսական ապրանքների ներկրման առումով:

Թուրք հոդվածագիրը նաև նշում է նաև, որ տասնամյակներ շարունակ Ռուսաստանի հետ հարաբերություններում ավանդական հավասարակշռության վիճակը, թերեւս, Թուրքիայի լավագույն արտաքին քաղաքական որոշումն էր։ Այդ հարաբերությունների զարգացումը և Ռուսաստանից կախվածության մեծացումը ցանկալի արդյունք չտվեցին։

«Եթե ​​մտադրությունը մեր նկատմամբ Արևմուտքի հետաքրքրությունն ավելացնելն էր, ապա դա նույնպես տեղի չունեցավ։ Ճիշտ կլինի հարաբերությունները նորից դնել ավանդական հավասարակշռության գծի վրա և նվազեցնել ավելորդությունները։ Ուր էլ որ տանի ուկրաինական պատերազմը, Թուրքիայի անվտանգության ու միջազգային հեղինակության հետ կապված հարցերը պարզաբանման կարիք ունեն»,- եզրափակում է հոդվածի հեղինակը։