Հուլուսի Աքար. «Ուշի-ուշով հետևում ենք ռուս-ուկրաինական բանակցություններին»

Քաղաքական16:31, 30 Մարտ 2022

Հուլուսի Աքար. «Ուշի-ուշով հետևում ենք ռուս-ուկրաինական բանակցություններին»

Թուրքիայի պաշտպանության նախարար Հուլուսի Աքարը Կատարում կայացած «Դոհայի ֆորումին» պատասխանելով ամերիկյան «Bloomberg»-ի թղթակից Սիմոնե Ֆոքսմանի հարցերին, անդրադարձել է ռուս-ուկրաինական ճգնաժամին և թուրք-ամերիկյան ճգնաժամի պատճառներից մեկը դարձած ռուսական արտադրության S-400 զենիթահրթիռային ՀՕՊ համակարգերի խնդրին։

Աքարը պնդել է, որ ի սկզբանե Անկարան դեմ է եղել ռուս-ուկրաինական ճգնաժամին։

Թուրք նախարարի խոսքով՝ իրենք ուշադրությամբ հետևում են ռուս-ուկրաինական բանակցություններին։

«Եթե հարցը դիտարկենք ՆԱՏՕ-ի տեսանկյունից, ապա մենք պատրաստ ենք պաշտպանել ՆԱՏՕ անդամ երկրներին և վերջիններիս սահմանները»,-ասել է Աքարը։

Հիշեցնենք, որ Միացյալ Նահանգները ոչ պաշտոնապես Թուրքիային առաջարկել էր Ուկրաինային փոխանցել ռուսական արտադրության S-400 ՀՕՊ համակարգերը, որոնք Անկարան գնել էր Մոսկվայից, ինչի հետևանքով թուրք-ամերիկյան հարաբերություններում լուրջ ճգնաժամ էր առաջացել:

Անդրադառնալով լրագրողի՝ S-400-ների վերաբերյալ հարցին, Աքարը նշել է.

«Ինչպես գիտեք, այս պատմությունը սկսվում է 1990-ականներից։ Մենք հեռահար հակաօդային պաշտպանության համակարգեր էինք փնտրում։ S-400-ները Թուրքիայի համար ոչ թե ընտրություն էին, այլ հրամայական։ Սակայն այժմ Ֆրանսիայի և Իտալիայի հետ բանակցություններ ենք վարում պաշտպանական այլ համակարգերի շուրջ։ Անշուշտ ինչ-որ լուծում կկարողանանք գտնել և կկարողանանք գնել պաշտպանական այդ համակարգերը»։

«Bloomberg»-ը Աքարի հարցազրույցը հետևյալ կերպ է վերնագրել. «Պաշտպանության նախարար Աքարը հայտնում է, որ Թուրքիան բաց է S-400-ների այլընտրանքների համար»։

Աղբյուր` yeniçağgazetesi