Թուրքիայի նախկին վարչապետ Չիլլերը հրաժարվել է նոր կուսակցություն հիմնելու մտքից

Քաղաքական13:50, 29 Ապրիլ 2022

Թուրքիայի նախկին վարչապետ Չիլլերը հրաժարվել է նոր կուսակցություն հիմնելու մտքից

2023 թվականի հունիսին Թուրքիայում տեղի ունենալիք համապետական ընտրություններին ընդառաջ թուրք հայտնի կին քաղաքական գործիչ, 1993-1996թթ. Թուրքիայի վարչապետի պաշտոնը զբաղեցրած Թանսու Չիլլերը մտադիր էր նոր քաղաքական ուժ ձևավորել և մասնակցել առաջիկա ընտրություններին։

Թուրքական ազգայնական «Լավ» (İyi) կուսակցության փոխնախագահ Քորայ Այդընն այս կապակցությամբ հայտարարել էր, թե Չիլլերի իրական նպատակն իշխող ԱԶԿ-ին աջակցելն ու մասնավորապես իրենց կուսակցությունից ձայներ փախցնելն է:

Ըստ թուրքական մամուլում շրջանառվող լուրերի՝ Չիլլերն արդեն հետ է կանգնել նոր կուսակցություն ստեղծելու իր մտադրությունից, քանի որ բավականաչափ աջակցություն չի ստացել հանրային շրջանակներից:

Չիլլերի կուսակցության կազմավորման աշխատանքները համակարգող Օմեր Բիլգինը, ըստ մամուլի հրապարակումների, չի պատասխանում հեռախոսազանգերին:

Հիշեցնենք, որ տնտեսագետ Թանսու Չիլլերը Թուրքիայի պատմության մեջ դեռևս առաջին և միակ կինն է, ով զբաղեցրել է Թուրքիայի վարչապետի պաշտոնը։

Ակտիվ քաղաքական գործունեությամբ զբաղվել է 1990 թվականի նոյեմբերից՝ համալրելով պահպանողական «Ճիշտ ճանապարհի կուսակցության» շարքերը։ 1993 թվականի հունիսին դարձել է այդ կուսակցության առաջնորդը։

1996-1997 թվականներին զբաղեցրել է Թուրքիայի արտաքին գործերի նախարարի պաշտոն։ Ակտիվ պայքար է ծավալել անջատողական քրդերի և «ASALA»-ի դեմ։ 1993 թվականի հունիսի 25-ից մինչև 1996 թվականի մարտի 6-ը զբաղեցրել է Թուրքիայի վարչապետի պաշտոնը։

Նրա կառավարման օրոք կնքվել է մաքսային համաձայնագիրը՝ ԵՄ-ի և Թուրքիայի միջև։ 2002 թվականին վերջնականապես հեռացել է մեծ քաղաքականությունից։

Աղբյուր` Diken.com.tr