Էրդողանի խորհրդականը հեռախոսազրույց է ունեցել ԱՄՆ նախագահի անվտանգության հարցերով խորհրդականի հետ

Քաղաքական11:51, 31 Մայիս 2022

Էրդողանի խորհրդականը հեռախոսազրույց է ունեցել ԱՄՆ նախագահի անվտանգության հարցերով խորհրդականի հետ

Թուրքիայի նախագահի Ռեջեփ Էրդողանի գլխավոր խորհրդական և խոսնակ Իբրահիմ Քալընը հեռախոսազրույց է ունեցել ԱՄՆ նախագահի ազգային անվտանգության հարցերով խորհրդական Ջեյք Սալիվանի հետ: Կողմերը քննարկել են երկկողմ հարաբերությունների, Շվեդիայի ու Ֆինլանդիայի ՆԱՏՕ-ին անդամակցության գործընթացի, միջազգային պարենային անվտանգության, էներգետիկ անվտանգության, ահաբեկչության դեմ պայքարի, Ուկրաինայի պատերազմի, Սիրիայի վերաբերյալ հարցեր:

Քալընը խոսել է Թուրքիա-ԱՄՆ ռազմավարական մեխանիզմի կյանքի կոչմամբ տարածաշրջանային խնդիրների, տնտեսական, էներգետիկ ու ռազմաարդյունաբերական ոլորտներում կողմերի համագործակցության ընդլայնման ակնկալիքների մասին:

Ուկրաինայում շարունակվող պատերազմի վերաբերյալ քննարվել է դրա երկարաձգման դեպքում պարենային ու էներգետիկ անվտանգության, ինչպես նաև համաշխարհային տնտեսության վրա թողնելիք բացասական ազդեցության հնարավորությունը: Խոսվել է ուկրաինացի փախստականների խնդրի մասին:

Քալընը պնդել է, որ որ ՆԱՏՕ-ին անդամակցել ցանկացող երկրները պետք է յուրացնեն ահաբեկչության դեմ պայքարի հարցում դաշինքի որդեգրած արժեքները: Այս համատեքստում նա շեշտվել է, որ «Թուրքիայի ազգային անվտանգությանը սպառնացող ահաբեկչական կազմակերպությունների հարցում Շվեդիան ու Ֆինլանդիան կոնկրետ քայլեր անեն»:

Կողմերը խոսել են նաև Սիրիայում առկա իրավիճակի մասին: Թուրքական կողմը հերթական անգամ հայտարարել է, որ Սիրիայի քրդական «Դեմոկրատական միություն» կուսակցությունը (PYD) և դրա ռազմական թևը հանդիսացող «Ժողովրդի պաշտպանության ուժերը» (YPG) ահաբեկչական են և իրենց համար սպառնալիք են ներկայացնում:

«Ուշադրություն է հրավիրվել (Քալընի կողմից) այն հանգամանքի վրա, որ PKK/PYD/YPG ահաբեկչական կազմակերպությունները սպառնալիք են ներկայացնում Թուրքիայի ազգային անվտանգության և Սիրիայի տարածքային ամբողջականության համար»,- ասված է պաշտոնական հաղորդագրության մեջ:

Աղբյուր` tccb.gov.tr