Թուրքիայում հիշել են սպանված ռուս դեսպանին ու խոսել ռուս-թուրքական հարաբերությունների հեռանկարից

Քաղաքական13:54, 19 Դեկտեմբեր 2022

Թուրքիայում հիշել են սպանված ռուս դեսպանին ու խոսել ռուս-թուրքական հարաբերությունների հեռանկարից

Թուրքիայի արտգործնախարար Մևլութ Չավուշօղլուն մասնակցել է 2016-ին Անկարայում սպանված Ռուսաստանի դեսպան Անդրեյ Կարլովին նվիրված հիշատակման միջոցառմանը: Չավուշօղլուն անդրադարձել է ռուս-թուրքական հարաբերությունների առանցքային հարցերին:

«Թուրքիան ու Ռուսաստանը զարգացնում են համագործակցությունը և երկխոսությունը: Մեր հարաբերությունները, որոնք ընդգրկում են լայն շրջանակ՝ առևտրից մինչև զբոսաշրջություն, էներգետիկայից մինչև ներդրումներ, զարգանում են։ Մենք շարունակելու ենք մեծացնել մեր ջանքերն այս ուղղությամբ՝ ելնելով մեր ժողովրդի ցանկությունից և ընդհանուր շահերից»,-ասել է Չավուշօղլուն։

Վերջինս նորից առաջ է քաշել թուրքական այն պնդումները, թե սպանությունն ուղղված էր ռուս-թուրքական «բարեկամության» դեմ:

2016-ի դեկտեմբերի 19-ին Անկարայում սպանվել էր Թուրքիայում Ռուսաստանի արտակարգ և լիազոր դեսպան Անդրեյ Կառլովը։ Ռուս դեսպանի վրա հարձակումը կատարվել էր Անկարայում ժամանակակից արվեստների կենտրոնում, որտեղ տեղի էր ունենում «Ռուսաստանը՝ Կալինինգրադից մինչև Կամչատկա, զբոսաշրջիկի աչքերով» լուսանկարչական ցուցահանդեսի պաշտոնական բացումը։

Հարձակումն իրականցրած անձը, ով եղել էր ոստիկանության աշխատակից, մտել էր թանգարան, Կարլովի ելույթի ժամանակ նախ օդ էր կրակել, ապա թիկունքից կրակել էր դեսպանի վրա։ Մարդասպանը բղավոցով վանկարկել էր «Ալլահ աքբար, չմոռանաք Հալեպը, չմոռանաք Սիրիան»:

Հետագայում թուրքական կողմը հայտարարեց, թե մարդասպանը կապ է ունեցել Թուրքիայում ահաբեկչական համարվող գյուլենական համայնքի հետ, որը ըստ պաշտոնական Անկարայի՝ նախաձեռնել էր 2016-ի ռազմական հեղաշրջման փորձը:

Աղբյուր` TRT