Հայաստանից 5 բեռնատար հրատապ օգնություն է ուղարկվել Թուրքիա Մարգարայի կամրջով

Քաղաքական14:05, 11 Փետրվար 2023

Հայաստանից 5 բեռնատար հրատապ օգնություն է ուղարկվել Թուրքիա Մարգարայի կամրջով

Հայաստանի և Թուրքիայի միջև հարաբերությունների կարգավորման գործընթացում Թուրքիայի հատուկ ներկայացուցիչ, դեսպան Սերդար Քըլըչը շնորհակալություն է հայտնել Հայաստանին փետրվարի 6-ին Թուրքիայում տեղի ունեցած հուժկու երկրաշարժից հետո ցուցաբերված մարդասիրական օգնության համար։

Նա երկու լեզվով՝ թուրքերեն և անգլերեն, գրառում է արել Twitter-ում։

Թուրքերեն գրառման մեջ նշած է․ «Ի հավելումն երկրաշարժից անմիջապես հետո 28 հոգանոց որոնողափրկարարական խմբի և տեխնիկական սարքավորումների՝ Հայաստանի ժողովրդի 5 բեռնատար՝ 100 տոննա պարենի, դեղորայքի, ջրի և այլ ապրանքների հրատապ օգնության խմբաքանակով առավոտյան անցել է Ալիջանի սահմանային անցակետը և շարժվել դեպի Ադըյաման։

Շնորհակալություն, Ռուբեն Ռուբինյան, շնորհակալություն Հայաստան»։

Անգլերեն գրառման մեջ էլ դեսպան Քըլըչը շնորհակալություն է հայտնել ՀՀ փոխարտգործնախարար Վահան Կոստանյանին և Հայաստանի հատուկ ներկայացուցիչ, Հայաստանի ԱԺ նախագահի տեղակալ Ռուբեն Ռուբինյանին գործադրած ջանքերի համար և հավելել․

«Ես միշտ կհիշեմ Հայաստանի ժողովրդի ուղարկած առատաձեռն աջակցությունը` օգնելու մեղմացնել Թուրքիայում երկրաշարժի գոտու մեր քաղաքացիների տառապանքները»:

Հիշեցնենք, որ Թուրքիայի Ադըյաման քաղաքում հայ փրկարարները շարունակում են աշխատանքները, իսկ այսօր՝ փետրվարի 11-ին, Հայաստանը նաև ցամաքային սահմանով հումանիտար օգնությամբ բեռնված բեռնատարներ է ուղարկել Թուրքիա։ Այդ մասին Twitter-ում գրառում է արել Հայաստանի ԱԳՆ խոսնակ Վահան Հունանյանը։

«Այսօր Հայաստանը հումանիտար օգնություն է ուղարկել Թուրքիա։ Հումանիտար օգնությամբ բեռնատարները սահմանին հատել են Մարգարայի կամուրջը և ուղևորվում են երկրաշարժից տուժած շրջան»,- գրել է Հունանյանը։