Թուրքական լրատվականների պնդմամբ՝ Աքշեները նոր մրցակից կարող է ունենալ

Քաղաքական12:47, 21 Հունիս 2023

Թուրքական լրատվականների պնդմամբ՝ Աքշեները նոր մրցակից կարող է ունենալ

Թուրքական մեդիայում շրջանառվում են լուրեր, ըստ որի՝ ընդդիմադիր ազգայնական «Լավ» (İyi) կուսակցության առաջնորդ Մերալ Աքշեներին որպես մրցակից կարող է հանդես գալ թուրքական «Միասնական միտք» հարթակի հիմնադիրների խորհրդի անդամ Գյունայ Քոդազը: Ոչ պաշտոնական տեղեկությունների համաձայն կուսակցության ղեկավարի փոփոխության հարցը կարող է քննարկվել առաջիկա համագումարում:

Մասնավորապես թուրքական ընդդիմադիր «Cumhuriyet» թերթում տեղ գտած նյութի համաձայն՝ նմանատիպ պնդումներին զուգահեռ առաջ է քաշվել պնդումներ մի շարք նահանգապետերի կողմից Աքշեներին աջակցություն հայտնելու և նույնիսկ Քոդազին կուսակցության որոշ «WhatsApp»-ի խմբերից դուրս հանելու մասին:

Բացի այդ, մի շարք լրատավականներում նաև հրապարակվել են «Լավ» կուսակցության առաջնորդի հավանական թեկնածուի քննադատական խոսքերն ուղղված Աքշեներին:

«Ես նկատել եմ, որ կուսակցությունը չի կարողացել հասնել ինստիտուցիոնալ համակարգի, իսկ կառուցվածքը գնալով նեխում է: Աքշեները, ով ճանապարհ ընկնելուց ի վեր ամեն ինչ մեզ էր հարցնում, վերածվել է մեկի, ով 8 տարի անց մեր հասած կետում ոչ մի կերպ չի զրուցում մեզ հետ: Նա իր դռները փակել է մեր առաջ: Եթե ինձ զիջի ղեկավարի պարտականությունները, կանեմ այնպես, ինչպես հարկն է: Երբ այդ ամբիոն բարձրանամ, կբարձրանամ որպեսզի հաղթենք»:

Նշենք, որ Թուրքիայում մայիսի 14-ի համապետական և մայիսի 28-ի նախագահական ընտրությունների 2-րդ փուլում ընդդիմադիր թևի պարտությունից հետո նմանատիպ իրավիճակ է ստեղծվել նաև գլխավոր ընդդիմադիր կուսակցություն համարվող քեմալական «Ժողովրդահանրապետական» կուսակցության (ԺՀԿ-CHP) շարքերում:

Աղբյուր` artigercek.com