Ադրբեջան է մեկնել Թուրքիայի խորհրդարանի նախագահ Նուման Քուրթուլմուշը

Քաղաքական12:14, 13 Հուլիս 2023

Ադրբեջան է մեկնել Թուրքիայի խորհրդարանի նախագահ Նուման Քուրթուլմուշը

Թուրքիայի խորհրդարանի նախագահ Նուման Քուրթուլմուշը խորհրդարանական պատվիրակության հետ Հյուսիսային Կիպրոս կատարած այցից հետո մեկնել է Ադրբեջան։

Ադրբեջանում նրանց դիմավորել են Ադրբեջանի խորհրդարանի առաջին փոխնախագահ Ալի Հուսեյնլին, Ադրբեջան-Թուրքիա միջխորհրդարանական բարեկամության խմբի նախագահ Եհլիման Էմիրասլանովը, Անկարայում Ադրբեջանի դեսպան Ռաշադ Մամեդովը և Բաքվում Թուրքիայի դեսպան Ջահիթ Բաղջըն։

Քուրթուլմուշը հանդիպել է Ադրբեջանի խորհրդարանի նախագահ տկն Սահիբե Գաֆարովայի և վարչապետ Ալի Ասադովի հետ։

Բաքվում Քուրթուլմուշը հայտարարել է․ «Ադրբեջանը Կովկասում Թուրքիայի ամենակարևոր դաշնակիցն է։ Թուրքիայի եղբայրն է։ Մի երկիր է, որի հետ բոլոր ոլորտներում ունենք փայլուն հարաբերություններ։ Թուրքիան, Ադրբեջանը և Հյուսիսային Կիպրոսը միմյանց մոտ երեք երկրներ են, որոնք շարժվում են «մեկ ազգ, երեք պետություն» սկզբունքով»։

Նաև հավելել է, որ արևելյան Միջերկրականում Կիպրոսի հետ Թուրքիայի ունեցած հարաբերությունը և Կովկասում Ադրբեջանի հետ Թուրքիայի ունեցած հարաբերությունը ծայրաստիճան կարևոր է, ռազմավարական տեսանկյունից էլ՝ ծայրաստիճան արժեքավոր։ Այստեղ Ադրբեջանի ուժեղ լինելը նշանակում է, որ Թուրքիան է ուժեղ տարածաշրջանում, նույն կերպ էլ Հյուսիսային Կիպրոսի ուժեղ լինելը նշանակում է, որ Թուրքիան է ուժեղ տարածաշրջանում։

Աղբյուր` hurriyet.com.tr