Թուրքիայի կրթության նախարարը մտադիր է ստեղծել աղջիկների և տղաների առանձին դպրոցներ

Հասարակական14:32, 13 Սեպտեմբեր 2023

Թուրքիայի կրթության նախարարը մտադիր է ստեղծել աղջիկների և տղաների առանձին դպրոցներ

Թուրքիայի կրթության նախարար Յուսուֆ Թեքինը խոսել է երկրում հատուկ միայն աղջիկների և հատուկ միայն տղաների համար նախատեսված դպրոցների բացման հնարավորության մասին։

Թեքինը նման դպրոցների բացման պատճառ է համարել այն, որ բազմաթիվ ծնողներ, մի շարք հանգամանքերից ելնելով, իրենց երեխաներին դպրոց չեն ուղարկում, ապա որպես օրինակ նշել ամենից շատ հանդիպող պատճառներից մեկը։

«Ես չեմ ցանկանում իմ աղջիկ երեխային տղաների հետ նույն դպրոց ուղարկել»։

Նախարարն այս համատեքստում իր առաջնահերթ խնդիրն է համարել աղջիկ երեխաների կրթության գործընթացի ապահովումը։

«Եթե անհրաժեշտ լինի, պիտի աղջիկների դպրոց էլ կարողանանք բացել։ Եթե ծնողը ցանկանա, պետք է կարողանա իր երեխային աղջիկների համար նախատեսված դպրոց ուղարկել, իսկ եթե ցանկանա տղաների դպրոց ուղարկել, ապա դա էլ պետք է կարողանա անել»։

Թուրքիայի ընդդիմադիր «Կանաչ ձախ» կուսակցական (Yeşil Sol Parti) անդամ Մեհմեդ Զեքինի այն հարցին, թե արդյոք հարցը դրվել է խորհրդարանում և քայլեր ձեռնարկվել այդ ուղղությամբ, նախարարը պատասխանել է․

«Ազգային կրթության հիմնական օրենքի «խառը կրթության» աղջիկ/տղա համատեղ կրթություն ստանալու մասին կետում առկա է «էական է դպրոցներում աղջկա և տղայի խառը կրթություն ստանալը, սակայն կախված կրթության տեսակից, հնարավորությունից և դժվարություններից որոշ դպրոցներ կարող են առաձնացվել, կամ միայն աղջիկների համար, կամ միայն տղաների համար» դրույթը։

Ապա հավելել․ «Ինչպես երևում է, անհրաժեշտության դեպքում միայն աղջիկ և կամ միայն տղա աշակերտների համար նախատեսված առանձին դպրոց բացելը օրենքով չի խոչընդոտվում»։

Նշենք, որ թուրքական մամուլում Թեքինի նման խոսքերը որակվել են որպես «խառը կրթության» թիրախավորում։ Եվ ի քննադատություն նախարարի արտահայտությունների՝ թուրքական մեդիայում դրանց զուգահեռ շրջանառվում է Թուրքիայի կրթության մասին օրենքի 12-րդ կետը՝ «Աշխարհիկությունն առանցքային է ազգային կրթության գործընթացում»։

Աղբյուր` diken.com.tr

Այս ենթաբաժնի վերջին նորությունները

14:11, 22 նոյ

Թուրքիան գործարկել է սեփական արտադրության առաջին քվանտային համակարգիչը

Քվանտային համակարգիչները կբարձրացնեն Թուրքիայի մրցունակությունը ռազմարդյունաբերությունից մինչև ֆինանսական տեխնոլոգիաներ:

11:59, 22 նոյ

Թուրքիան ներառված չէ այն երկրների ցանկում, որտեղ Իսրայելի վարչապետը չի կարող մեկնել

Միջազգային քրեական դատարանն Իսրայելի վարչապետին և նախկին պաշտպանության նախարարին «պատերազմական հանցագործության» մեղադրանքով ձերբակալելու որոշում էկայացրել։