Թուրքիայի իշխող կուսակցության փոխնախագահն ընդդիմադիրներին մեղադրել է քրդերին շահագործելու մեջ

Քաղաքական10:49, 28 Նոյեմբեր 2023

Թուրքիայի իշխող կուսակցության փոխնախագահն ընդդիմադիրներին մեղադրել է քրդերին շահագործելու մեջ

Թուրքիայում իշխող «Արդարություն և զարգացում» կուսակցության (AKP-ԱԶԿ) փոխնախագահ Օմեր Չելիքը նոյեմբերի 27-ին գումարված կուցակցության կենտրոնական կառավարման խորհրդի նիստից հետո մամուլի ասուլիս է տվել:

Չելիքն ասուլիսի ընթացքում, անդրադառնալով Թուրքիայում գլխավոր ընդդիմադիր ուժ համարվող «Ժողովրդահանրապետական» կուսակցության (ԺՀԿ-CHP) նորընտիր ղեկավար Օզգյուր Օզելի՝ քրդերի վերաբերյալ արած հայտարարությանը, ասել է.

«ՀԺԿ-ն ասում է, որ ընտրություններին մոտենալուն զուգահեռ սկսել է քուրդ ընտրողին շահագործելու սեզոնը»:

Այսպիսով ստացվում է, որ Չելիքը Օզելին մեղադրել է քրդերին շահագործելու և այդ ուղղությամբ աշխատանքներ տանելու մեջ:

Նշենք, որ Օզելը խոսել էր Թուրքիայում ապրող մարդկանց հավասարությունից, իսկ քրդերին համարել ավելի քիչ հավասարություն ունեցող ժողովուրդ:

«Թուրքիայում բոլորը հավասար են, սակայն քրդերն ավելի քիչ են հավասար: Մենք քրդերին թույլ չենք տալիս քաղաքապետ ընտրել: Քուրդ ընտրողը չի մոռանալու դա այնպես, ինչպես ձմռան ավարտին գայլը չի մոռանում իր կերած սառնամանիքը: Քուրդն էլ չի մոռանալու իր կերած սառնամանիքը»:

«Ձմռան ավարտին գայլը չի մոռանում իր կերած սառնամանիքը» թուրքական դարձվածք է, որը նշանակում է, որ թեկուզ ձմեռն էլ անցնի գայլը ձմռանը կրած իր տառապանքներն ու դժվարությունները չի մոռանա:

Աղբյուր` rudaw.net