Հոդված12:20, 12 Հուլիս 2024
Թուրքիայում սիրիացի փախստականների դեմ ատելության խոսույթն աճում է
Թուրքիայի կենտրոնական Կայսերի (Կեսարիա) նահանգում մի խումբ թուրքերի կողմից սիրիացիների գույքի և աշխատատեղերի վրա իրականացված հարձակումներից հետո թուրք-սիրիական ազգամիջյան հարաբերությունները հայտնվել են բավականին բարդ փուլում:
Նկատելի է, որ Թուրքիայում հասարակության շրջանում, ինչպես նաև այդ հասարակության տրամադրություններն արտացոլող սոցցանցերի թուրքալեզու տիրույթում սիրիացի փախստականների նկատմամբ տրամադրվածությունները թշնամական են՝ հիմնված այլատյացության և կայսերական մտածելակերպով ձևավորված գերակայության վրա:
Սիրիացի փախստականների նկատմամբ ատելության և ատելության խոսքի տարածման բազմաթիվ դրսևորումների կարելի է հանդիպել Թուրքիայում հանրության մեծամասնության կողմից ակտիվորեն օգտագործվող X (Twitter) սոցհարթակում:
Բազմաթիվ օգտատերեր հունիսի 30-ին Կայսերիում տեղի ունեցած դեպքերից հետո մինչ օրս շարունակում են սիրիացիների դեմ արշավներ իրականացնել: Նրանք մեծամասամբ պահանջում են սիրիացի փախստականների վտարում Թուրքիայից՝ նշելով, որ իրենց հայրենիքում սիրիացի տեսնել չեն ուզում:
Օրինակ Հալիլ Թուրան անունով օգտատերը սիրիացիներին անվանում է անհայրենիք․ «Սրանք նույնիսկ սիրիացի չեն, այլ անհայրենիք և կրոնազուրկ…»:
Շատերը Թուրքիայում հաստատված սիրիացի փախստականներին վերաբերվում են իբրև ահաբեկիչների և զուգահեռներ անցկացնում թուրքական պետության կողմից ահաբեկչական ճանաչված «Քուրդիստանի բանվորական կուսակցության» (ՔԲԿ-PKK) միջև:
Օգտատեր Գյոքհան Թեքինը գրում է. «Այն ինչ չեն կարողացել անել PKK-ի միջոցով, սիրիացի արաբներն են անելու հարավ-արևելքում»՝ զուգահեռաբար սիրիացիներին կոչելով մոլեռանդ և տգետ:
Սիրիացիների նկատմամբ իրականացվող գործողություններին զուգահեռ շատերը սկսել են ավելի ընդգծված արտահայտվել սիրիացիներին իրենց երկրում տեսնելու ցանկություն չունենալու մասին:
Մինչ Մեհմեդ Էրիղիթ անունով թուրք օգտատերն ափսոսում է, որ Թուրքիայի սահմանները բացվել են սիրիացիների առաջ, Ռոման Վլադիսլավ անունով օգտատերը խոսում է Սիրիայից բռնակցված նախկին Ալեքսանդրետի սանջակի՝ ներկայիս Հաթայ նահանգի թուրքական լինելու մասին: «Հաթայը թուրքական հող է… որտեղի՞ց ծլեցին սիրիացիները»,-գրել է նա:
Հատկանշական է նաև այն, որ տեղի ունեցածի առաջին օրերին սիրիացիների նկատմամբ իրականացվածը շատերին առիթ է տվել արտահայտվելու Թուրքիայում ապաստանած այլ արաբական ծագման փոքրամասնությունների դեմ: Զուգահեռներ են անցկացվել աֆղանցիների և պակիստանցների միջև:
Անմասն չեն մնացել այն օգտատերերը ևս, որոնք կայսերական մտածելակերպի հիման վրա թուրքերին բոլոր ազգերից վեր են դասում:
«Կրոնազուրկ թուրքը մուսուլման սիրիացուց բարձր է»․ Պետք է նաև ընդգծել, որ նմանատիպ գրառումները կատարվում են նաև ոչ անձնական էջերով:
Սիրիացիներին Թուրքիայից վռնդելու ցանկության մասին արտահայտվողներ ևս քիչ չեն գտնվել: Ստորև ներկայացված նկարում Էրքան անունով օգտատիրոջ գրառումն է, որտեղ նա, դիմելով նահանգապետին (Կայսերիի նահանգապետին), պետության միակ անելիքը համարում է սիրիացիներին վռնդել այնպես, ինչպես վռնդում են հայրենիքի դավաճաններին:
Ակնհայտ է՝ վերոգրյալը ցուցիչն է այն բանի, որ թե՛ Թուրքիայում հասարակության շրջանում և թե՛ թուրքալեզու մեդիատիրույթում հետզհետե աճում է սիրիացի փախստականների նկատմամբ ատելության խոսույթը, ստանում նոր շերտեր, ինչն էլ ավելի է նպաստելու թուրք-սիրիական հարաբերություններում առկա բարդությունների խորացմանը:
Հասարակության շրջանում դժգոհության այս մակարդակը չի կարող չարտացոլվել և չօգտագործվել նաև թուրքական քաղաքական դաշտում, որտեղ տարիներ շարունակ ընդդիմադիր ուժերը երկրի իշխանություններին են մեղադրում Սիրիայի գործերին միջամտելու, կենտրոնական իշխանության դեմ գործող տարատեսակ ուժերին աջակցելու, սիրիացի փախստականներին ընդունելու և այդ քաղաքականության հետևանքով առաջ եկած բազմաթիվ խնդիրները լուծել չկարողանալու մեջ։
Այս ենթաբաժնի վերջին նորությունները
Անդամակցության դեպքում ի՞նչ կտա Թուրքիան BRICS-ին և ի՞նչ հնարավորություններ կբացի BRICS-ը Թուրքիայի առաջ։
Թվում է, թե այս հայտարարությունն անում է ժողովրդավարական արժեքներով առաջնորդվող մի երկրի ղեկավար, սակայն հայտարարությունը հակասում է Թուրքիայում տիրող իրավիճակին։
Ջան Աթաքլըն բացառում է, որ այդ որոշումը կայացված լինի առանց Էրդողանի իմացության։
Ուղիղ խոսք
Ոմանց ձեռքին միջուկային մարտագլխիկներով հրթիռներ կան, իսկ իմ ձեռքում ինչո՞ւ չպետք է լինեն: Ես դա չեմ ընդունում
ամենաշատ ընթերցված
Անդամակցության դեպքում ի՞նչ կտա Թուրքիան BRICS-ին և ի՞նչ հնարավորություններ կբացի BRICS-ը Թուրքիայի առաջ։
Տեսանյութում երևում է, թե ինչպես է քաղաքապետարանի աշխատակիցը խոնավ կտորով մաքրում Աթաթուրքի արձանը։ Դա համարվել է ոչ պատշաճ վերաբերմունք Թուրքիայի Հանրապետության հիմանդրի հիշատակին։
«Պոգրոմը խորհրդանշում է ոչ միայն այս ժողովուրդների նկատմամբ իրականացված ֆիզիկական հարձակումները, այլև պետական աջակցությամբ սեփականազրկման և գույքի յուրացման գործընթացը»:
Թուրքիայի Կանանց ասոցիացիաների ֆեդերացիան զեկույց է հրապարակել է 2024-ի կանանց սպանությունների վերաբերյալ։
Թուրքիայի նախագահ Ռեջեփ Թայիփ Էրդողանը մաղթել է, որ OVP-ն շահավետ լինի երկրի համար:
Օրացույց
Հարցումներ
Այս տարի կբացվի՞ հայ-թուրքական սահմանը 2 երկրների քաղաքացիների համար:
արտարժույթ
EUR | TRY | USD |
549.84 | 90.05 | 485.12 |