ERMENI HABER AJANSI

Թուրքիայում գործող ընդդիմադիր «Ժողովուրդների հավասարություն և ժողովրդավարություն կուսակցության» (DEM) պատվիրակությունը ցանկանում է 3-րդ հանդիպումն ունենալ «Քուրդիստանի բանվորական կուսակցության» (ՔԲԿ-PKK) հիմնադիր-առաջնորդ, ցմահ բանտարկյալ Աբդուլլահ Օջալանի հետ:

Պաշտոնական Անկարան ՔԲԿ-ին որակում է որպես ահաբեկչական կազմակերպություն, ինչպես նաև մեղադրում Թուրքիայում մի շարք ահաբեկչական գործողությունների իրականացման մեջ:

Պատվիրակությունը հանդիպման համար Թուրքիայի պատկան կառույցներից ցանկանում է թույլտվություն ստանալ Իրաքյան Քուրդիստան կատարելիք այցից հետո:

Ընդդիմադիրներն Օջալանի հետ հանդիպելու են Իրաքյան Քուրդիստանում ունեցած շփումների և տիրող իրավիճակի մասին տեղեկություն փոխանցելու նպատակով:

Ավելի վաղ՝ երկրորդ հանդիպումից հետո, շրջանառվում էին լուրեր, թե փետրվարի 15-ին Օջալանը կարող է պատմական հայտարարություն անել, որն այս կամ այն կերպ նպաստելու է թուրք-քրդական հարաբերությունների կարգավորմանը: 

Հիշեցնենք, որ Օջալանը 1999-ից մինչ օրս գտնվում է Մարմարա ծովի Իմրալը կղզու բանտում։

Նրա հետ բանակցություններն ու հանդիպումները մեկնարկել էին Թուրքիայի իշխող «Արդարություն և զարգացում կուսակցության» (ԱԶԿ-AKP) հետ դաշինքի մեջ գտնվող, թուրքական ծայրահեղական  «Գորշ գայլեր» կազմակերպության քաղաքական թևի՝ «Ազգայնական շարժում կուսակցության» (ԱՇԿ-MHP) առաջնորդ Դևլեթ Բահչելիի՝ Օջալանին ներում շնորհելու և այդպիսով ՔԲԿ-ի հետ կապված հարցերը լուծելու մասին հայտարարություններից հետո:

«Հարցը նրանում չէ, որ եթե ես այդ քայլն անեմ ԱՇԿ-ն կամ ձայն կստանա, կամ կկորցնի, այլ եթե ես այդ քայլը անեմ, հող չեմ տա, իսկ պետության ու հայրենիքի ամբողջականությունը կշարունակվի։

Եթե պետք է տանջվեմ, կտանջվեմ, բայց եթե այս քայլը չանեմ, Թուրքիան հող կկորցնի, իսկ այդ ժամանակ ի՞նչ անեմ իշխանությունը»։