ERMENI HABER AJANSI

Թուրքիայում գործող ընդդիմադիր «ժողովուրդների հավասարություն և ժողովրդավարություն կուսակցության» (DEM) ներկայացուցիչները հանդիպել են Իրաքյան Քուրդիստանի ինքնավար շրջանի ղեկավար Մեսութ Բարզանիի հետ:

Նրա աշխատակազմի տարածած հայտարարության համաձայն՝ «DEM»-ի ներկայացուցիչները Բարզանիին են փոխանցել «Քուրդիստանի բանվորական կուսակցության» (ՔԲԿ-PKK) հիմնադիր-առաջնորդ Աբդուլլահ Օջալանի ուղերձները, ինչպես նաև մանրամասներ ներկայացրել նրա հետ ունեցած 2 հանդիպման վերաբերյալ:

Պաշտոնական Անկարան ՔԲԿ-ին համարում է ահաբեկչական կազմակերպություն, ինչպես նաև մեղադրում Թուրքիայում մի շարք ահաբեկչական գործողություններ իրականացնելու մեջ:

Հայտարարությունում ողջունվել է Օջալանի հետ բանակցությունների մեկնարկը և համարվել, որ այն խնդիրների լուծման ճիշտ տարբերակն է:

Բացի այդ ընդգծվել է, որ Բարզանին աջակցում է մեկնարկած գործնթացին և աջակցելու համար պատրաստ է անել այն ամենը, ինչ կախված է իրենից:

Հանդիպմանը ներկա է եղել Թուրքիայի «Ժողովրդավարական շրջանների կուսակցության» (DBP) համանախագահ Քեսքին Բայնընդըրը, ով թեմայի վերաբերյալ կատարած կարճ հայտարարությունում նշել է, որ հանդիպումները լինելու են շարունակական:

Ավելի վաղ ընդդիմադիրները հայտնել էին նաև, որ Օջալանի հետ ցանկանում են հանդիպել 3-րդ անգամ՝ Իրաքյան Քուրդիստանում ունեցած շփումների և տիրող իրավիճակի մասին տեղեկություն փոխանցելու նպատակով:

Հիշեցնենք, որ Օջալանը 1999-ից մինչ օրս գտնվում է Մարմարա ծովի Իմրալը կղզու բանտում։

Նրա հետ բանակցություններն ու հանդիպումները մեկնարկել էին Թուրքիայի իշխող «Արդարություն և զարգացում կուսակցության» (ԱԶԿ-AKP) հետ դաշինքի մեջ գտնվող, թուրքական ծայրահեղական  «Գորշ գայլեր» կազմակերպության քաղաքական թևի՝ «Ազգայնական շարժում կուսակցության» (ԱՇԿ-MHP) առաջնորդ Դևլեթ Բահչելիի՝ Օջալանին ներում շնորհելու և այդպիսով ՔԲԿ-ի հետ կապված հարցերը լուծելու մասին հայտարարություններից հետո:

«Հարցը նրանում չէ, որ եթե ես այդ քայլն անեմ ԱՇԿ-ն կամ ձայն կստանա, կամ կկորցնի, այլ եթե ես այդ քայլը անեմ, հող չեմ տա, իսկ պետության ու հայրենիքի ամբողջականությունը կշարունակվի։

Եթե պետք է տանջվեմ, կտանջվեմ, բայց եթե այս քայլը չանեմ, Թուրքիան հող կկորցնի, իսկ այդ ժամանակ ի՞նչ անեմ իշխանությունը»։