Հունական մամուլը մտահոգված է Թուրքիայի «Կապույտ հայրենիք» օրինագծով

Հունական մամուլը գրում է, որ Թուրքիան մտադիր է մինչև տարեվերջ խորհրդարան ներկայացնել «Կապույտ հայրենիք» (Mavi Vatan) օրինագիծը։ Այն վերաբերում է Սև ծովում, Էգեյան ծովում և Միջերկրական ծովի արևելյան հատվածում Թուրքիայի ծովային գոտիներին։

Հունական լրատվամիջոցների փոխանցմամբ՝ օրինագծի ընդունումը կարող է ազդել Հունաստանի, Կիպրոսի և Իսրայելի միջև էլեկտրական ցանցերի միացման նախագծի, ինչպես նաև ածխաջրածինների որոնման աշխատանքների վրա Կրետե կղզուց հարավ։ Նշվում է, որ նախատեսվող օրենսդրական կարգավորման համաձայն՝ Թուրքիայի ծովային գոտիներում ծովի հատակի ուսումնասիրությունների ու այլ գործունեության համար անհրաժեշտ կլինի ստանալ Անկարայի թույլտվությունը։

Հունական մամուլը նաև նշում է, որ այդ վիճահարույց օրինագիծը կարող է ամրապնդել Թուրքիայի և Լիբիայի միջև ծովային գոտիների սահմանազատման վերաբերյալ համաձայնագրի իրավական հիմքերը։ Աթենքը նմանատիպ զարգացումը համարում է ահազանգ, քանի որ դրանք կարող են վնասել Հունաստանի շահերին։

Աղբյուր՝  Haber7