Թուրքիայի նախագահ Ռեջեփ Թայիփ Էրդողանը Հարավաֆրիկյան Հանրապետությունում անցկացված «G20»-ի անդամ երկրների ղեկավարների գագաթնաժողովի շրջանակում հանդիպել է Ֆրանսիայի նախագահ Էմանուել Մակրոնին։
Ինչպես հայտնում են Թուրքիայի նախագահականից, օրակարգում են եղել երկու երկրների հարաբերությունները, ինչպես նաև տարածաշրջանային և համաշխարհային նշանակության հարցեր։ Էրդողանը կարևորել է երկկողմ հարաբերությունների զարգացմանն ուղղված փոխադարձ քայլերը։
Անդրադառնալով Պաղեստինի Գազայի հատվածի շուրջ տեղի ունեցող զարգացումներին՝ Էրդողանն ընդգծել է այնտեղ հաստատված հրադադարի պահպանման և հումանիտար բեռների անխոչընդոտ մուտքի ապահովան կարևորությունը։ Թուրքիայի նախագահը հերթական անգամ հայտարարել է, որ տևական խաղաղության տանող ճանապարհը 2 պետության ստեղծումն է և դա ապահովելու համար Թուրքիան ջանք է գործադրել։
Քննարկման շրջանակից անմասն չի մնացել նաև ռուս-ուկրաինական պատերազմը։ Թուրքիայի նախագահը պատերազմն արդար և կայուն խաղաղությամբ հանգուցալուծելու համար անհրաժեշտ է համարել օգտվել դիվանագիտական բոլոր հնարավորություններից։ Բացի այդ Էրդողանը հավելել է, որ Թուրքիան շարունակելու է ջանքեր գործադրել՝ հակամարտող կողմերին խաղաղակենտրոն բանակցությունների սեղանի շուրջ հավաքելու համար։
Աղբյուր՝ Son Dakika
