Թուրքական «Yeşil İğdir» լրատվական կայքը հայտնել է, որ Թուրքիայի ընդդիմադիր «Ժողովրդահանրապետական կուսակցության» (CHP-ԺՀԿ) Իգդիրի մարզային կառույցի ղեկավար Նիզամեթթին Ադան հանդիպում է ունեցել տեղական լրատվամիջոցների ներկայացուցիչների հետ: Օրակարգում է եղել Ալիջան սահմանային անցակետի բացումը, Հայաստանի հետ հնարավոր զբոսաշրջային աշխուժացումը և տեղական ինքնակառավարման մարմինների բացթողումները։
Նշվում է, որ Ադան ընդգծել է Ալիջան անցակետի հնարավոր բացման դեպքում Հայաստանից ժամանող զբոսաշրջիկների ընդունման հարցում նախապատրաստական աշխատանքների կարևորությունը՝ տեղեկացնելով, որ այդ նպատակով պատրաստվել և համապատասխան պետական կառույցներին է ներկայացվել համապարփակ զբոսաշրջային զեկույց։
Նա մասնավորապես նշել է. «Մինչ սահմանային անցակետի բացումն անհրաժեշտ է ավարտել բոլոր նախապատրաստական աշխատանքները։ Նախկինում թույլ տրված ռազմավարական սխալների պատճառով մենք կորցրինք իրանցի զբոսաշրջիկներին։ Եթե այժմ անհրաժեշտ քայլեր չձեռնարկվեն, նույն կերպ կարող ենք կորցնել նաև Հայաստանից ժամանող զբոսաշրջիկներին։ Սահմանամերձ քաղաք լինելու հնարավորությունը պետք է ճիշտ օգտագործել»։
Ադան, որպես դրական օրինակ, նշել է հարևան Վանի փորձը, որտեղ զբոսաշրջիկների համար ապահովվում է կազմակերպված և անվճար տրանսպորտ սահմանից դեպի քաղաք և հակառակ ուղղությամբ, ինչը, նրա խոսքով, զգալիորեն նպաստել է զբոսաշրջության զարգացմանը։ Միևնույն ժամանակ նա քննադատել է Իգդիրի քաղաքային ենթակառուցվածքների աշխատանքը և քաղաքի մաքրության վիճակը՝ նշելով, որ քաղաքում բացակայում են անգամ ամենահիմնական պայմանները, այդ թվում՝ հասարակական զուգարանները։
Ելույթն ամփոփելով՝ նա կոչ է արել տեղական իշխանություններին, գործարարներին և բնակչությանը համախմբվել՝ ընդգծելով, որ միայն համատեղ և ժամանակին ձեռնարկված քայլերով հնարավոր կլինի արդյունավետ օգտագործել սահմանամերձ դիրքի ընձեռած հնարավորությունները և ապահովել այցելուների պատշաճ ընդունելությունը։
Աղբյուր՝ Yeşil İğdir
