Իրանի արտաքին գործերի նախարարության խոսնակ Նասեր Քանանին հայտարարել է, որ տարածաշրջանային երկրները կարևոր և կառուցողական դեր են խաղացել Թեհրան-Վաշինգտոն բանակցային գործընթացի ակտիվացման ուղղությամբ՝ առանձնահատուկ շնորհակալություն հայտնելով Թուրքիային։ Նրա խոսքով՝ Իրանը բարձր է գնահատում այն բոլոր հարևանների ջանքերը, որոնք նպաստել են բանակցությունների առաջմղմանը և լարվածության նվազեցմանը՝ առանձնացնելով հատկապես Թուրքիայի դերը։
Քանանին նշել է, որ Անկարան այն սակավաթիվ դերակատարներից է, որը միաժամանակ պահպանում է հաղորդակցության բաց ուղիներ թե՛ Վաշինգտոնի, թե՛ Թեհրանի հետ՝ փորձելով կանխել հնարավոր ռազմական սրացումները։ Նա հիշեցրել է, որ հունվարի 30-ին Ստամբուլում հանդիպում է տեղի ունեցել Թուրքիայի արտգործնախարար Հաքան Ֆիդանի և Իրանի արտգործնախարար Աբբաս Արաղչիի միջև, որից հետո Արաղչին հանդիպել է նաև Թուրքիայի նախագահ Ռեջեփ Թայիփ Էրդողանի հետ։
Խոսնակը ընդգծել է, որ Իրանը շարունակում է հավատարիմ մնալ դիվանագիտական ուղուն և շահերի պաշտպանությանը բանակցությունների միջոցով։ Նա հավելել է, որ Իրանի համար կարևոր է հնարավորինս արագ արդյունքի հասնել, քանի որ առաջնահերթ խնդիր է համարում պատժամիջոցների վերացումը՝ հերքելով այն պնդումները, թե Թեհրանը բանակցությունները ձգձգում է ժամանակ շահելու նպատակով։
Աղբյուր՝ milliyet.com.tr
