Իրանի արտգործնախարար Աբբաս Արաղչին հայտարարել է, որ Իրանը որևէ պատճառ չունի հարձակվելու Թուրքիայի վրա՝ հերքելով այն մեղադրանքները, թե Թուրքիայի տարածք ընկած հրթիռը արձակվել է Իրանից։
Ամերիկյան մամուլին տված հարցազրույցում Արաղչին նշել է, որ ՆԱՏՕ-ի տարածած այս պնդումը չի համապատասխանում իրականությանը։ Նրա խոսքով՝ Իրանի զինված ուժերը կտրականապես մերժում են նման մեղադրանքները։
«Թուրքիան մեր լավ հարևանն է, և մենք որևէ պատճառ չունենք նրան հարձակվելու համար», -ասել է նա։
Իրանի արտաքին գործերի նախարարը նաև նշել է, որ վերջին օրերին Թուրքիայի օդային տարածք մտնելու վերաբերյալ հրթիռային միջադեպի շուրջ քննություն է ընթանում։ Նրա խոսքով՝ հնարավոր է, որ հրթիռը արձակված լինի այլ ուղղությունից կամ տեղի ունեցած լինի տեխնիկական խնդիր։ Արաղչին ընդգծել է, որ Իրանի ռազմական գործողությունները ուղղված չեն հարևան երկրների դեմ։
«Մենք երբեք թիրախ չենք դարձրել մուսուլմանական երկրներին։ Մեր գործողությունները ուղղված են միայն ԱՄՆ-ի ռազմակայանների և ռազմական օբյեկտների դեմ», -հավելել է նա։
Աղբյուր՝ Egeligazete.com
