Թուրքիայի արտգործնախարար Հաքան Ֆիդանը հեռախոսազրույցներ է ունեցել Իրանի, Եգիպտոսի, Իրաքի արտգործնախարարների ու Եվրահանձնաժողովի փոխնախագահ և արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասի հետ։
Ֆիդանը քննարկել է պատերազմը դադարեցնելու համար ձեռնարկվող քայլերը և տարածաշրջանային վերջին զարգացումները, ինչպես նաև գնահատվել են պատերազմը դադարեցնելուն ուղղված ջանքերը։ Իրանական աղբյուրները հայտնում են, որ Աբբաս Արաղչիի հետ հեռախոսազրույցի ընթացքում կողմերը մտքեր են փոխանակել տարածաշրջանային զարգացումների շուրջ։ Արաղչին հայտարարել է, որ Իրանը վճռական է պաշտպանելու իր ինքնիշխանությունը և իրեն իրավունք է վերապահում հարվածել հարևան երկրներում գտնվող ամերիկյան ռազմաբազաներին, քանի որ դրանք օգտագործվում են Իրանի դեմ։
Արաղչին շեշտել է, որ Հորմուզի նեղուցում նավագնացության անվտանգության խաթարումը ԱՄՆ-ի և Իսրայելի ագրեսիայի ուղղակի հետևանքն է, իսկ Հաքան Ֆիդանը կարևորել է լարվածության նվազեցմանն ուղղված ջանքերը և տարածաշրջանի երկրների ու Իրանի միջև հարաբերությունների ամրապնդումը։
Աղբյուր՝ TRT Haber
