Թուրքիայի նախագահ Ռեջեփ Թայիփ Էրդողանի գլխավորությամբ մայիսի 4-ին տեղի է ունեցել կառավարության նիստ։ Օրակարգային հարցերի թվում է եղել իրավիճակը Մերձավոր Արևելքում և Հորմուզի նեղուցում, բացի այդ քննարկվել են նաև Եվրամիության (ԵՄ) հետ հարաբերությունները և Թուրքիայի տնտեսական հարցերը։
Էրդողանը նշել է, որ վերջին 12 ամսում Թուրքիայի արտահանման ծավալը հանրապետության պատմության մեջ 1-ին անգամ հասել է 275.8 մլրդ դոլարի։ Ըստ նրա՝ աճ է գրանցվել բոլոր ոլորտներում և 166 տարբեր երկրների ու տարածաշրջանների հետ առևտրում։
Անդրադառնալով ԵՄ-ի հետ հարաբերություններին՝ Էրդողանը նշել է, որ Եվրամիությունն առանց Թուրքիայի՝ որպես լիիրավ անդամի, չի կարող լինել համաշխարհային խաղացող և գրավչության կենտրոն։ Ըստ Թուրքիայի նախագահի՝ Եվրոպան այսօր ավելի շատ ունի Թուրքիայի կարիքը, քան Թուրքիան Եվրոպայի։ Էրդողանը եվրոպացի գործընկերներին կոչ է արել հարաբերություններ կառուցել «քաղաքական և պատմական նախապաշարմունքներից զերծ՝ հավասարության սկզբունքի շրջանակներում»։
Աղբյուր՝ Haberler
