Բելգիայի մայրաքաղաք Բրյուսելում հոկտեմբերի 20-ին տեղի կունենա Թուրքիայի և Բելգիայի արտաքին գործերի, արդարադատության և ներքին գործերի նախարարների 4-րդ հանդիպումը։
Ինչպես հայտնում է Թուրքիայի պետական «Anadolu» լրատվական գործակալությունը, թուրքական պատվիրակությունը կգլխավորեն արտգործնախարար Հաքան Ֆիդանը, ներքին գործերի նախարար Մուստաֆա Չիֆթչին և արդարադատության նախարար Աքըն Գյուրլեքը։
Նման ձևաչափով նախորդ հանդիպումը տեղի էր ունեցել 2016 թ. Անկարայում։
Հանդիպման ընթացքում կողմերը նախատեսում են քննարկել երկկողմ համագործակցության օրակարգը, մասնավորապես՝ ահաբեկչության դեմ պայքարը, դատական և ոստիկանական ոլորտներում համագործակցությունը, ռազմական արդյունաբերությունը, ինչպես նաև վիզային և միգրացիոն հարցերը։ Անդրադարձ կարվի նաև տարածաշրջանային ու միջազգային զարգացումներին։
Բելգիա կատարած այցի շրջանակում Ֆիդանը նախատեսում է առանձին հանդիպումներ ունենալ նաև Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասի և ՆԱՏՕ-ի գլխավոր քարտուղար Մարկ Ռյուտեի հետ։
Անդրադառնալով երկկողմ հարաբերությունների դինամիկային՝ գործակալությունը նշում է, որ վերջին շրջանում ակտիվացած բարձրաստիճան շփումները նպաստել են տարբեր ոլորտներում համագործակցության խորացմանը։ Մասնավորապես՝ մայիսի 10-14-ը Թուրքիա էր այցելել Բելգիայի թագուհու գլխավորած տնտեսական պատվիրակությունը։
2025թ. երկու երկրների միջև ապրանքաշրջանառությունը կազմել է 9.2 մլրդ դոլար և կողմերի նպատակն է այն հասցնել 15 մլրդ դոլարի։ Երկկողմ հարաբերություններում կարևոր դեր է խաղում նաև Բելգիայում բնակվող շուրջ 300.000 թուրքական համայնքը, որը ծառայում է որպես կապող օղակ երկու երկրների միջև։
Աղբյուր՝ Anadolu
