Թուրքիայում գլխավոր ընդդիմադիր ուժ համարվող «Ժողովրդահանրապետական» կուսակցության (ԺՀԿ-CHP) առաջնորդ Օզգյուր Օզելն Հրանտ Դինքի ընտանիքին այցի է գնացել: Օզելի և Դինքի ընտանիքի հանդիպումը կայացել է վերջինիս հիշողության կենտրոնում:
Ընդդիմադիր կուսակցապետին ուղեկցել են «ԺՀԿ»-ի ղեկավարի օգնական Գյոքչե Գյոքչեն, Դիարբեքիրի «ԺՀԿ»-ական պատգամավոր Սեզգին Թանրըքուլուն և Ստամբուլում «ԺՀԿ»-ական կառույցի ղեկավար Օզգյուր Չելիքը:
Հիշեցնենք, որ Թուրքիայում մինչ օրս լույս տեսնոս «Ակօս» թերթի հիմնադիր և գլխավոր խմբագիր Հրանտ Դինքը սպանվել է 2007թ. հունվարի 19-ին Ստամբուլում՝ հենց խմբագրատան դիմաց: Թուրքիայում նա մշտապես բացահայտ խոսել է 1915-ի Հայոց ցեղասպանության մասին։ Մշտապես հանդես է եկել հայ և թուրք ժողովուրդների երկխոսության կոչերով՝ նշելով, որ դա կհանգեցնի երկու երկրների միջև հարաբերությունների կարգավորմանը:
Սպանությունից առաջ Հրանտ Դինքը դատապարտվել էր Թուրքիայի ՔՕ 301 հոդվածով, որը պատիժ է սահմանում «թուրք ազգին վիրավորելու համար»: Նրա սպանությունից հետո Թուրքիայի ողջ տարածքում տեղի են ունեցել բազմահազարանոց ցույցեր: Սպանությունը դատապարտել էին նաև օտարերկրյա պետությունների ղեկավարները և միջազգային հանրությունը։
Աղբյուր՝ Artı Gerçek
