Թուրքական մամուլը հաղորդում է, որ Թուրքիայի էներգետիկայի և բնական պաշարների նախարար Ալփարսլան Բայրաքթարի գնահատմամբ Թուրքիան հանքային հումքի ու ռեսուրսների բազմազանությամբ աշխարհում 7-րդ տեղում է։ Նախարարը նշել է, որ ոլորտը 2024 թվականի դրությամբ հասել է 363 մլրդ լիրայի ծավալի։ Լրատվամիջոցների փոխանցմամբ՝ Բայրաքթարը «Պատասխանատու հանքագործություն» 2025 համաժողովում հիշեցրել է, որ աշխարհում հայտնի 90 տեսակի հանքանյութերից 70-ը հայտնաբերված է Թուրքիայի տարածքում։
Անցած տարի երկրի հանքային արտահանումը կազմել է մոտ 6 մլրդ դոլար, իսկ այս տարվա առաջին 11 ամիսներին՝ 5․1 միլիարդ դոլար։ Տարվա ավարտին ակնկալվում է 6 մլրդ դոլարը գերազանցող արդյունք։ Բայրաքթարի խոսքով՝ Թուրքիան բորի, նատրիումի կարբոնատի, գիպսի և քրոմի արտադրությամբ աշխարհի առաջատար առաջին հինգ երկրների շարքում է։
Նախարարը նշել է, որ հանքագործության ոլորտում շուրջ 141 հազար մարդ է զբաղված, իսկ կառավարության ռազմավարական նպատակն է բարձրացնել ոլորտի բաժինը երկրի ՀՆԱ-ում՝ ներկայիս մոտ 0․6%-ից հասցնելով 5%-ի։ Նա ընդգծել է, որ Անկարան ցանկանում է զարգացնել հանքագործությունը «բնապահպանական նորմերին համահունչ և հումքը բարձրարժեք արտադրանքի վերածող մոտեցմամբ»։
Նշվում է նաև, որ Էսքիշեհիր-Բեյլիքովա տարածաշրջանում իրականացված ուսումնասիրությունների արդյունքում կատարված 125 հազար մետրից ավելի հորատումներով հայտնաբերվել է 694 մլն տոննա եզակի հանքային ռեզերվ, որը համարվում է մեկ վայրում աշխարհի երկրորդ խոշոր պաշարը։
Աղբյուր՝ tekha.com.tr
