Իսրայելական «Jerusalem Post» թերթը վերլուծական հոդված է հրապարակել թուրք-սիրիական հարաբերությունների և Թուրքիայից եկող սպառնալիքի մասին։
Ըստ թերթի՝ 2023-ի հոկտեմբերի 7-ից ի վեր Իսրայելի քաղաքական և ռազմական ղեկավարությունը նշում է, որ երկիրը սպառնալիքի տակ է յոթ տարբեր ճակատներից ու հավելվել է, որ այդ սպառնալիքներին ավելացվում է 8-րդ ճակատը՝ Թուրքիան, որը ավելի ու ավելի վտանգավոր դառնում։
Մասնավորապես նշվել է, որ մոտ 20 տարի առաջ Թուրքիան Իսրայելի մտերիմ դաշնակիցն էր, բայց Ռեջեփ Թայիփ Էրդողանի իշխանության գալուց հետո Իսրայելի համար հայտնվել է «բացահայտ թշնամու» դիրքում։
Թուրքիայի կոշտ դիրքորոշումը Իսրայելի, Կիպրոսի Հանրապետության և Հունաստանի նկատմամբ հիմնված է երեք հիմնարար տարրերի վրա՝ կրոնական աշխարհայացք, ազգայնական/ազգայնամոլական մոտեցում և տարածաշրջանային տերություն լինելու ձգտում: Նշվում է, որ այդ դիրքորոշումը «չի կարող պայմանավորված լինել միայն Էրդողանի անձով, այլ դրա արմատները ձգվում են ավելի քան մեկ դար։
Ըստ «Jerusalem Post»-ի՝ երկար տարիներ Թուրքիայի կոշտ դիրքորոշումը Իսրայելի նկատմամբ հիմնականում մնացել է բանավոր մակարդակում, այնուամենայնիվ վերջին երկու տարիների ընթացքում «Անկարայի հակաիսրայելական դիրքորոշման մեջ նկատվել է արմատականացում, որը ներառում է ռազմական հակամարտության հնարավորություն»։
Իսրայելը գիտակցում է Թուրքիայից եկող հնարավոր սպառնալիքը, սակայն անմիջական հակամարտության հավանականությունը ներկայումս համարվում է ցածր՝ ԱՄՆ-ի հավասարակշռող դերի պատճառով։ Այնուամենայնիվ շեշտվում է, որ հակամարտության հետևանքները կլինեն «չափազանց ծանր»։ Նշվում է նաև, որ Թուրքիան ունի հզոր և ժամանակակից նավատորմ ու կարող է այդ կարողություններով ծովային շրջափակում սահմանել Իսրայելի դեմ։
Ըստ թերթի, ակնհայտ է այն տեսակետը, որ Իսրայելը պետք է խորացնի ռազմական և ռազմավարական համագործակցությունը Կիպրոսի և Հունաստանի հետ՝ Թուրքիայից եկող հնարավոր սպառնալիքների դեմ, քանի որ Կիպրոսն ու Հունաստանը նույնպես ունեն նմանատիպ անվտանգային մտահոգություններ Անկարայի քաղաքականության վերաբերյալ։
Աղբյուր՝ Cumhuriyet
