Թուրքական մամուլի փոխանցմամբ՝ Թուրքիայի էներգետիկայի և բնական պաշարների նախարար Ալփարսլան Բայրաքթարը հայտարարել է, որ ԱՄՆ-ում հիմնված «Chevron» ընկերությունը նախատեսում է ներգրավվել Թուրքիայում նավթի և բնական գազի որոնման ու հորատման աշխատանքներին։ Նրա խոսքով՝ Թուրքիայի նավթային ընկերության և «Chevron»-ի միջև համագործակցության համաձայնագիրը նախատեսվում է ստորագրել փետրվարին՝ Ստամբուլում։
Բայրաքթարը նշել է, որ նախատեսվող համագործակցությունը ներառելու է սեյսմիկ հետազոտություններ և հորատման գործողություններ ինչպես Թուրքիայի տարածքում, այնպես էլ այլ տարածաշրջաններում։ Ըստ նրա՝ համատեղ որոնումները կարող են իրականացվել Սև և Միջերկրական ծովերում, ինչպես նաև աշխարհի տարբեր հատվածներում։ Նախարարը հավելել է, որ Թուրքիան նպատակ ունի ընդլայնել իր էներգետիկ հետազոտական գործունեությունը թե՛ երկրի ներսում, թե՛ արտասահմանում՝ որպես 2026 թվականի էներգետիկ ռազմավարության առանցքային ուղղություն։
Աղբյուր՝ www.babaocagi.com.tr
