Ստամբուլի ընդդիմադիր նախկին քաղաքապետի կնոջ եղբայրը ձերբակալվել է

Ստամբուլի դատախազության կողմից թմրանյութերի և թմրամիջոցների ապօրինի շրջանառության վերաբերյալ իրականացվող հետաքննության շրջանակում ձերբակալվել է Ստամբուլի նախկին քաղաքապետ, Թուրքիայում գլխավոր ընդդիմադիր ուժ համարվող «Ժողովրդահանրապետական» կուսակցության առաջադրած երկրի նախագահի թեկնածու, այժմ բանտարկյալ Էքրեմ Իմամօղլուի կնոջ՝ Դիլեք Իմամօղլուի եղբայրը՝ Ալի Քայան։

Թուրքական լրատվամիջոցների փոխանցմամբ՝ վերջինս ընդգրկված է 19 անձից բաղկացած խմբի մեջ, որոնք ձերբակալվել են դատախազության կողմից իրականացված հերթական օպերացիայի ընթացքում։ Քննությունը վերաբերում է թմրամիջոցների արտադրության և վաճառքի, դրանց օգտագործումը դյուրացնելու, ինչպես նաև թմրամիջոցների ձեռքբերման և օգտագործման հոդվածներին։

Գործի շրջանակում ձերբակալվածների թվում կան նաև սոցիալական ցանցերում հայտնի մի շարք անձինք։ Դատախազության հաղորդմամբ՝ նախաքննությունն այս պահին ընթացքի մեջ է:

Աղբյուր՝ Haberler