Թուրքիան ու Իրանը քննարկել են Թեհրան-Անկարա և Թեհրան-Ստամբուլ երկաթուղիների վերագործարկման հարցը

Ստամբուլում կայացել է Իսլամական երկրների տրանսպորտի նախարարների 2-րդ նիստը։ Նիստի շրջանակում Թուրքիայի խորհրդարանի նախագահ Նուման Քուրթուլմուշը հանդիպել է Իրանի ճանապարհների և քաղաքաշինության նախարար Ֆարզանե Սադեղի հետ։

Կողմերը քննարկել են տրանսպորտի ոլորտում համագործակցության ներկա վիճակը և առաջիկա ծրագրերը, ինչպես նաև համաձայնության են եկել տրանսպորտի ոլորտում համապարփակ համագործակցության շուրջ։ Բացի այդ քննարկվել է նաև Վանա լճի երկայնքով «Ro-Ro» տրանսպորտի (տրեյլերով փոխադրումներ) մեծացման հարցը:

Կողմերը նշել են, որ Չեշմե Սյուրայյա-Արալըք կետում նոր երկաթուղային կապի հաստատումը ռազմավարական նշանակություն ունի Արևելք-Արևմուտք միջազգային երկաթուղային տարանցիկ գծի ամբողջացման տեսանկյունից։ Հանդիպման ընթացքում քննարկվել է նաև երկար ժամանակ դադարեցված Թեհրան-Անկարա և Թեհրան-Ստամբուլ երկաթուղային հաղորդակցությունների վերագործակման հարցը, և ընդգծվել է, որ ուղևորափոխադրումների և բեռնափոխադրումների վերականգնումը զգալիորեն կնպաստի երկրների միջև տնտեսական և սոցիալական կապերի ամրապնդմանը։

Աղբյուր՝ Hurseda.net