Հնդկաստանի դեսպանը հանդիպել է Թուրքիայի գործարարների հետ

Թուրքական խոշոր ընկերությունների ղեկավարները հանդիպել են Թուրքիայում Հնդկաստանի դեսպան Մուքթեշ Քումար Պարդեշիի հետ։ Անկարայում կայացած հանդիպմանը մասնակցել են ֆինանսախորհրդատվական «RST Grup International»-ի տնօրենների խորհրդի նախագահ Լևենթ Օզբայը և «Aysa İnşaat» շինարարական ընկերության ղեկավար Սաֆեթ Այդընը։

Կողմերը գնահատել են երկու երկրների միջև տնտեսական հարաբերությունների ներկա վիճակը և քննարկել համաշխարհային շուկայում ներդրումային նոր հնարավորությունները։ Օրակարգում է եղել հնդկական «Reelabs» ցողունային բջիջների կենտրոնի տեխնոլոգիական ենթակառուցվածքների և ռեգեներատիվ բժշկության ոլորտի ներդրումների ընդլայնումը Թուրքիայում։ Պայմանավորվածություն է ձեռք բերվել հեշտացնել տեխնոլոգիաների փոխանցումը, ինչպես նաև աջակցել համատեղ գիտական և առևտրական ծրագրերին:

Քննարկվել են նաև «Aysa İnşaat»-ի կողմից իրականացվող միջազգային նախագծերը և Հնդկաստանի շուկայում մեծածավալ ենթակառուցվածքային ներդրումների նոր մոդելները։ Հնդկաստանի դեսպան Պարդեշին գոհունակություն է հայտնել թուրքական գործարար շրջանակների հետ հանդիպումից և ընդգծել, որ տեխնոլոգիական, առողջապահական ու շինարարական ոլորտներում համագործակցությունը նոր մակարդակ կապահովի՝ երկկողմ դիվանագիտական ու առևտրային հարաբերությունների համար։ Նա վերահաստատել է դեսպանատան պատրաստակամությունը՝ աջակցելու երկու երկրների գործարարներին։

Աղբյուր՝ Aba Medya