Նյու Յորքի «Թուրքական տանը» (Türkevi) տեղի է ունեցել թուրք-ամերիկյան բիզնես գագաթնաժողով (Turkish-American Business Summit), որը մեկտեղել է գործարար, դիվանագիտական, մեդիա և մշակութային ոլորտների ներկայացուցիչներին։ Հանդիպման առանցքում եղել է երկու երկրների միջև առևտրաշրջանառության ծավալների մեծացումն ու թուրքական ընկերությունների ակտիվացումն ամերիկյան շուկայում։
Ըստ փորձագետների՝ վերջին տարիներին լոգիստիկայի, տեխնոլոգիաների, էներգետիկայի, տեքստիլի և ռազմարդյունաբերության ոլորտներում տնտեսական հարաբերությունների ամրապնդման շնորհիվ երկկողմ առևտրի ծավալն արդեն անցել է 30 միլիարդ դոլարը, իսկ միջնաժամկետ հեռանկարում նախատեսվում է այն հասցնել 40 միլիարդ դոլարի։
Հանդիպմանն ընդգծվել է, որ թուրքական ընկերություններն առավել ակտիվ են դառնում ԱՄՆ-ում ուղղակի ներդրումների, բրենդի ճանաչելիության և ծառայությունների արտահանման ոլորտներում, իսկ մեդիան, թվային բովանդակության արտադրությունն ու ստեղծարար արդյունաբերությունը նույնպես դիտարկվում են որպես աճի նոր ուղղություններ»։ «Egopro Medya»-ի հիմնադիր, պրոդյուսեր Բիրնազ Յըլմազ Գյուլնահարը հայտարարել է, որ թուրքական բրենդների տեսանելիությունը Նյու Յորքում տարեցտարի աճում է։
Միջոցառման ընթացքում «Թուրք-ամերիկյան գործարարների ասոցիացիայի» (TABA-AmCham) նախագահ Սյուլեյման Էջևիթ Սանլըի կողմից Նյու Յորքում Թուրքիայի գլխավոր հյուպատոս Մուհիթին Ահմեդ Յազալին է հանձնվել Նեջաթ Չուհադարօղլուի «Պիկասոյի վերամշակումը» ստեղծագործությունը։
Աղբյուր՝ Son Dakika
