Ըստ թուրք մասնագետների կանխատեսումների՝ Թուրքիան այս ամառ կարող է թևակոխել ծայրահեղ եղանակային երևույթների նոր փուլ՝ պայմանավորված «Սուպեր Էլ Նինյո» (Super El Niño) կլիմայական ֆենոմենով։ Խաղաղ օվկիանոսում ջրի մակերևութային ջերմաստիճանի անոմալ բարձրացումը կարող է լուրջ հետևանքներ ունենալ Թուրքիայի համար՝ մեծացնելով երաշտի, անտառային հրդեհների և ջրհեղեղների ռիսկը։
Իզմիրի «Բաքըրչայ» համալսարանի Աշխարհագրության ամբիոնի պրոֆեսոր Շերմին Թաղըլը նշել է, որ 2026-ի ամռանը և 2027-ի ընթացքում հնարավոր է գրանցվեն ջերմաստիճանային նոր ռեկորդներ։ Ըստ նրա՝ ռիսկերը Թուրքիայում բաշխվելու են ըստ տարածաշրջանների.
«Էգեյան», «Միջերկրական» և «Հարավարևելյան Անատոլիա» կոչվող տարածաշրջաններում կմեծանա երաշտի և ջրի սպառնալիքը։ «Սևծովյան» տարածաշրջանում սպասվում են տեղատարափ անձրևներ և ջրհեղեղներ, իսկ արդեն ամռան վերջին և աշնանը Միջերկրական ծովում հնարավոր է ձևավորվեն արևադարձային տիպի ուժգին փոթորիկներ (medicane)։
Փորձագետները կոչ են անում Թուրքիայի պատկան մարմիններին ռազմավարական նախապատրաստություն իրականացնել գյուղատնտեսության, էներգետիկայի և ջրային ռեսուրսների կառավարման ոլորտներում՝ «Սուպեր Էլ Նինյոյի» բացասական հետևանքները մեղմելու համար։
Աղբյուր՝ Tr Haber
