Ստամբուլում լրագրողները բողոքի ակցիա կիրականացնեն

Թուրքական ընդդիմադիր «Evrensel» թերթի փոխանցմամբ՝ Ստամբուլում գործող լրագրողները հունիսի 10-ին Թաքսիմի «Tünel» հրապարակում մամուլի ասուլիս և բողոքի ակցիա կանցկացնեն՝ պահանջելով ազատ արձակել իրենց կալանավորված գործընկերներին։

Ակցիայի կազմակերպիչները նախքան հավաքը տարածած կոչում ուշադրություն են հրավիրում «ETHA» լրատվական գործակալության աշխատակիցներ Փընար Գայիփի, Էլիֆ Բայբուրթի, Նադիյե Գյուրբյուզի և Մյուսլյում Քոյունի հետ կապված դեպքի վրա:

Նշվում է, որ նրանք ձերբակալվել են փետրվարի 3-ին՝ «Ճնշվածների սոցիալիստական կուսակցության» (ESP) դեմ իրականացված օպերացիաների շրջանակում։ Բացի այդ, ըդնգծվում է, որ լրագրողների ձերբակալությունից անցել է շուրջ 5 ամիս, սակայն նրանց վերաբերյալ մինչ օրս որևէ պաշտոնական մեղադրական չի կազմվել։

Կոչում շեշտադրվում է, որ լրագրությունը հանցագործություն չէ, և մեդիադաշտի նկատմամբ ճնշումներն ուղղված են հանրության՝ տեղեկատվություն ստանալու իրավունքի դեմ։

Լրագրողական միությունները, արհմիություններն ու ժողովրդավարական կազմակերպությունները կոչ են արել միանալ հունիսի 10-ին, ժամը 19:00-ին նախատեսված ակցիային և պահանջել բոլոր կալանավորված լրագրողների անհապաղ ազատ արձակումը։

Աղբյուր՝ Bir Gün