Թուրքիայի նախագահ Ռեջեփ Թայիփ Էրդողանը, ելույթ ունենալով իշխող «Արդարություն և զարգացում» կուսակցության (ԱԶԿ-AKP) խորհրդարանական խմբակցության նիստում, անդրադարձել է Միջերկրական ծովում և Կիպրոս կղզում տեղի ունեցող վերջին զարգացումներին։
Էրդողանը հայտարարել է, որ Անկարան թույլ չի տա որևէ կանխակալ գործողություն կամ հարձակում իր «եղբայրների» դեմ և քաջ գիտակցում է «Ավետյաց երկրի» (Arz-ı Mev’ud-Իսրայել) ցնորքի վերջնական նպատակները:
Թուրքիայի նախագահի պնդմամբ՝ Արևելյան Միջերկրականում (Միջերկրական ծովի արևելյան հատված), հատկապես Կիպրոսում, փորձ է արվում «սադրանքի կրակ» բորբոքել: Նա նշել է, որ որոշ «փոքր կառույցներ» ստանձնել են սիոնիզմի (ազգային հրեական շարժում) կապալառուի դերը և նստել Իսրայելի «սադրիչ նավակը»՝ գնալով Արևելյան Միջերկրականում պատրանքների հետևից։
«Շատ հստակ եմ ասում՝ թող ոչ ոք արկածախնդրության հետևից չընկնի և չբռնի սիոնիստական ցեղասպան ցանցի պոչը։ Եթե Արևելյան Միջերկրականում ոտնձգություն արվի Թուրքիայի և Կիպրոսի թուրքերի իրավունքների ու օրենքների դեմ, ապա թող լավ իմանան, որ մեր պատասխանը լինելու է շատ հստակ և շատ կոշտ»,- ամփոփել է Էրդողանը:
Աղբյուր՝ Trt Haber
