Թուրքիայի նախագահականի ռազմարդյունաբերության վարչության նախագահ Հալուք Գյորգյունը Վարշավայում հանդիպել է Լեհաստանի փոխվարչապետ և պաշտպանության նախարար Վլադիսլավ Կոսինյակ-Կամիշի հետ։
Հանդիպման ընթացքում կողմերը գնահատել են ռազմատեխնիկական հարաբերությունների ամրապնդման, ռազմարդյունաբերության ոլորտում համագործակցության խորացման և արդյունաբերական կարողությունների փոխադարձ զարգացման հեռանկարները։ Առանձնակի ուշադրություն է դարձվել անօդաչու թռչող սարքերի (ԱԹՍ) ոլորտին։
Այս համատեքստում քննարկվել են լեհական զինուժի կողմից թուրքական «Bayraktar» ԱԹՍ-ների կիրառման հնարավորությունների ընդլայնումը, օպերատիվ փորձի փոխանակումը և համատեղ աշխատանքային ոլորտների զարգացումը, արդի տեխնոլոգիաների հնարավոր փոխանցումը, ռազմարդյունաբերական էկոհամակարգերի միջև կապերի սերտացումը և փոխադարձ ներդրումների ավելացումը:
Հանդիպումից հետո Լեհաստանի պաշտպանության նախարարը, գոհունակություն հայտնելով երկկողմ հարաբերությունների ընթացքից, նշել է.
«Մեր քննարկումների առանցքային թեմաներից մեկը «Bayraktar» ԱԹՍ-ների կիրառմանն առնչվող հարցերն էին։ Ցանկանում ենք, որ դրանց օգտագործման մեր կարողություններն աստիճանաբար աճեն։ Ռազմական, քաղաքական և արդյունաբերական համագործակցությունը շատ լավ է ընթանում։ Եթե կյանքի կոչվեն Թուրքիայի ներդրումները Լեհաստանում և Լեհաստանի ներդրումները Թուրքիայում, ապա հարաբերություններում կհասնենք թիրախավորված մակարդակին»։
Աղբյուր՝ Anadolu
