Թուրքիայի վիճակագրական ինստիտուտը (TÜİK) հրապարակել է 2025թ. միջազգային միգրացիայի վերաբերյալ տվյալներ, որոնց համաձայն՝ անցած տարի Թուրքիա ներգաղթածների թիվը նախորդ տարվա համեմատ աճել է 25․2 տոկոսով՝ հասնելով 393.829 մարդու։
Ներգաղթածների 56․6 տոկոսը տղամարդիկ են, իսկ 43․4 տոկոսը՝ կանայք։ Թուրքիա ներգաղթածներից 91.952-ը Թուրքիայի քաղաքացիներ են, իսկ 301.877-ը՝ օտարերկրյա քաղաքացիներ։
Միաժամանակ, Թուրքիայից արտագաղթածների թիվը 2025թ.-ին 5 տոկոսով նվազել է և կազմել 403 216 մարդ։ Նրանցից 155.119-ը Թուրքիայի քաղաքացիներ են, իսկ 248.097-ը՝ օտարերկրյա քաղաքացիներ։
Տարիքային կառուցվածքի համաձայն՝ Թուրքիա ներգաղթածների շրջանում ամենամեծ խումբը 20-24 տարեկաններն են՝ 16․3 տոկոս։ Նրանց հաջորդում են 25-29 տարեկանները՝ 13․7 տոկոս, և 30-34 տարեկանները՝ 11․5 տոկոս։
Իսկ Թուրքիայից արտագաղթածների շրջանում առավել մեծ մասնաբաժին են կազմել 25-29 տարեկանները՝ 14․3 տոկոս։ Նրանց հաջորդել են 20-24 տարեկանները՝ 12․5 տոկոս և 30-34 տարեկանները՝ 12 տոկոս։
Ամենաշատ ներգաղթյալներ ընդունած քաղաքը եղել է Ստամբուլը, որտեղ կենտրոնացել է Թուրքիա ներգաղթածների 42․2 տոկոսը։ Ստամբուլին հաջորդում են Անթալիան (9․1%), Անկարան (6․7%), Իզմիրը (3․1%) և Բուրսան (2․9%)։
Արտագաղթի ցուցանիշներով նույնպես առաջին տեղում է Ստամբուլը՝ 35,4 տոկոսով, որին հաջորդում են Անկարան (8․7%), Անթալիան (6․5%), Մերսինը (4․3%) և Իզմիրը (3․7%)։
2025-ին Թուրքիա ժամանած օտարերկրյա քաղաքացիների մեջ 1-ին տեղում են եղել Թուրքմենստանի քաղաքացիները (23․4%)։ Նրանց հաջորդել են Ադրբեջանի (8․3%), Ուզբեսկստանի (6․9%), Եգիպտոսի (6․1%) և Աֆղանստանի (5․8%) քաղաքացիները։
Թուրքիայից հեռացած օտարերկրացիների շրջանում առաջին տեղում են եղել Իրաքի քաղաքացիները՝ 15․7 տոկոսով։ Նրանց հաջորդել են Աֆղանստանի (11․2%), Ռուսաստանի (7․6%), Իրանի (6․3%) և Թուրքմենստանի (5․7%) քաղաքացիները։
Աղբյուր՝ Ermenihaber.am
