Օջալանի պատվիրակությունը կբանակցի թուրքական իշխանությունների հետ

Թուրքիայում գործող ընդդիմադիր «Ժողովուրդների հավասարություն և ժողովրդավարություն» կուսակցության (DEM) այն անդամները, ովքեր բանակցում են «Քուրդիստանի բանվորական կուսակցության» (ՔԲԿ-PKK) հիմնադիր-առաջնորդ Աբդուլլահ Օջալանի հետ, հանդիպումներ են ունենալու թուրքական իշխանությունների ներկայացուցիչների հետ։

Օջալանի բանտարկության վայրի՝ Իմրալը կղզու անունը կրող պատվիրակությունը բանակցելու է Թուրքիայի խորհրդարանի նախագահ Նուման Քուրթուլմուշի ու իշխող «Արդարություն և զարգացում» կուսակցության (ԱԶԿ-AKP) խորհրդարանական խմբի փոխնախագահ Էֆքան Ալայի հետ։

Հանդիպման օրակարգում լինելու են «ՔԲԿ»-ի ինքնալուծարման գործընթացին վերաբերող «շրջանակային օրենքի» նախագծի քննարկումները։ «DEM»-ը պնդում է, որ օրենքի նախագիծը պետք է տարածվի լեռներում գտնվող «ՔԲԿ»-ի բոլոր անդամների վրա՝ առանց նրանց խմբավորելու կամ դասակարգելու։ Բացի դրանից կուսակցությունը պահանջում է, որ նախագիծը պատրաստվի այնպես, ինչպես քննարկվել ու համաձայնեցվել է Օջալանի հետ բանակցությունների ժամանակ։

Հավելենք, որ «Շրջանակային օրենքի» նախագիծը Իմրալըի վերաբերյալ այն իրավական կարգավորումն է, որն օրակարգ է բերվել Թուրքիայում քրդերի հետ խնդիրների լուծման գործընթացին իրավական հիմք ապահովելու և Օջալանի հետ անցկացվող բանակցությունների իրավական շրջանակը սահմանելու նպատակով։

Օրենքի ընդունմամբ ակնկալվում է նաև Օջալանի՝ Իմրալը կղզում գտնվելու պայմանների բարելավում, ինչպես նաև նրա տեղափոխումը նոր վայր, որտեղից նա կշարունակի վարել բանակցությունները։

Աղբյուր՝ Rudaw