Կանադայի և Թուրքիայի միջև ռազմավարական գործընկերություն է հաստատվել

Թուրքիայի նախագահ Ռեջեփ Թայիփ Էրդողանը Անկարայի նախագահական նստավայրում հանդիպել է Կանադայի վարչապետ Մարկ Քարնիին։ Համատեղ մամուլի ասուլիսի ընթացքում նշվել է, որ սա Մարկ Քարնիի Թուրքիա կատարված առաջին այցն է։

Էրդողանը նշել է , որ որոշվել է երկկողմ հարաբերությունները բարձրացնել ռազմավարական գործընկերության մակարդակի՝ ընդունելով էներգետիկայի, տրանսպորտի և պաշտպանության ոլորտներում համագործակցության գործողությունների ծրագիր: Կողմերը նաև պայմանավորվել են մինչև տարեվերջ սկսել Ազատ առևտրի համաձայնագրի շուրջ բանակցությունները՝ նպատակ ունենալով ապրանքաշրջանառությունը հասցնել 10 մլրդ դոլարի և կրկնապատկել ուղիղ չվերթերի քանակը:

Կանադայի վարչապետ Քարնին Թուրքիան անվանել է բացառիկ և վստահելի գործընկեր:  Նա հավելել է, որ Թուրքիայի և Կանադայի արտգործնախարարները ամենամյա կանոնավոր հանդիպումներ կանցկացնեն սահմանված նպատակների իրագործումը վերահսկելու համար, ինչը կապահովի համագործակցության կայուն ընթացքը:

Ելույթի ավարտին Կանադայի վարչապետը գովասանքով է խոսել Թուրքիայի Հանրապետության հիմնադիր Մուստաֆա Քեմալ Աթաթուրքի մասին՝ խոսքը եզրափակելով նրա հայտնի. «Խաղաղություն երկրում, խաղաղություն աշխարհում» (Yurtta sulh, cihanda sulh) խոսքերով:

Քարնին այցելել է նաև Անըթքաբիր (Աթաթուրքի դամբարան) և ծաղկեպսակ դրել նրա հուշաքարին:

Հանդիպման ավարտին կողմերն ազդարարել են ռազմավարական գործընկերության մեկնարկն ու ստորագրել 3 փաստաթուղթ՝ «Պաշտպանական ոլորտի գործընկերության փոխըմբռնման հուշագիր», «Օդային փոխադրումների մասին համաձայնագիր» և «Էներգետիկայի ոլորտում համագործակցության մասին համատեղ հայտարարություն»։

Աղբյուր՝ DW, Cumhuriyet