Թուրքիայի մի շարք քաղաքներում նոյեմբերի 17-ի առավոտյան գործողություններ են իրականացվել փաստաբանների, ընդդիմադիր լրատվամիջոցների և քուրդ քաղաքական գործիչների դեմ։
Դիարբեքիրում ձերբակալվել են մի շարք քուրդ քաղաքական գործիչներ, այդ թվում՝ «Քուրդիստանի սոցիալիստական կուսակցության» (PSK) նախագահ Բայրամ Բոզյելը։
Գործողություններ են իրականացվել նաև Իզմիրում, որտեղ ձերբակալվել է առնվազն 6 փաստաբան, որոնցից 5-ը փաստաբանների միության անդամներ են։ Միության տվյալներով՝ խուզարկություններ են կատարվել փաստաբանների տներում, առգրավվել են թվային սարքեր, ինչպես նաև սահմանափակվել է ձերբակալվածների և նրանց պաշտպանների միջև հաղորդակցությունը։
Միությունը տեղի ունեցածը որակել է որպես պաշտպանության իրավունքի ոտնահարում՝ նշելով, որ փաստաբանների մասնագիտական գործունեությունը քրեականացնելու փորձ է արվում։
Գործողություններին արձագանքել է նաև քրդամետ «Ժողովուրդների հավասարության և ժողովրդավարության» (DEM) կուսակցությունը։ Կուսակցության հաղորդմամբ՝ նույն առավոտյան խուզարկություն է իրականացվել նաև ընդդիմադիր «Sözcü TV» հեռուստաալիքում։
Կուսակցությունը դատապարտել է քաղաքական գործիչների, փաստաբանների և լրատվամիջոցների դեմ գործողությունները՝ դրանք որակելով որպես հակաժողովրդավարական ճնշումներ։ Կուսակցությունը կոչ է արել դադարեցնել նման գործելակերպը՝ ընդգծելով, որ մամուլի ազատությունը, ժողովրդավարական քաղաքական գործունեությունն ու միավորումների ազատությունը ժողովրդավարական հասարակության հիմնարար սկզբունքներ են։
Աղբյուր՝ Rudaw, Arti Gerçek
Ստամբուլում ԹՊԿ անդամ երկրների քաղաքացիների սպասարկումը կհեշտացվի
Ստամբուլի օդանավակայանում նրանց համար կստեղծվի առանձին հաշվառման կետ։




