Կահիրեում կայացել է «Թուրքիա–Եգիպտոս պալատների և բորսաների համագործակցության համաժողովը», որը կազմակերպվել է Եգիպտոսի առևտրի և արդյունաբերության պալատների ֆեդերացիայի հովանու ներքո։ Միջոցառմանը մասնակցել են երկու երկրների տնտեսական կառույցների և գործարար շրջանակների ներկայացուցիչներ։
Ֆորումի ընթացքում քննարկվել են առևտրաշրջանառության ավելացմանն ուղղված քայլերը, ինչպես նաև ոլորտային համագործակցության հնարավորությունները։ Հատուկ ուշադրություն է դարձվել Մերսին–Ալեքսանդրիա և Իսկենդերուն–Դամիետտա ուղղություններով Ro-Ro (տրեյլերներով փոխադրումներ) բեռնափոխադրումների վերագործարկման հարցին, որը, ըստ կողմերի, կարող է էականորեն արագացնել փոխադարձ առևտուրը։
Միջոցառման ավարտին «Թուրքիայի առևտրի և արդյունաբերության պալատների միության» (TOBB) և «Եգիպտոսի առևտրի և արդյունաբերության պալատների ֆեդերացիայի» միջև ստորագրվել է համագործակցության համաձայնագիր։ Փաստաթուղթը նախատեսում է համատեղ գործունեություն արդյունաբերության, առևտրի, գյուղատնտեսության, ձկնորսության, զբոսաշրջության, լոգիստիկայի և շինարարության ոլորտներում։
Աղբյուր՝ Finanzen
