Թուրքիայում սոցիալ-տնտեսական վիճակը շարունակում է վատթարանալ։ Միլիոնավոր քաղաքացիներ դժվարանում են հոգալ հիմնական կարիքները՝ սնունդ, վարձավճար, ջեռուցում և էլեկտրաէներգիա։ Պաշտոնական տվյալներով՝ շուրջ 4 մլն ընտանիք (մոտ 16 մլն մարդ) ստանում է ամսական 5.050 լիրա (ավելի քան 112$) սոցիալական աջակցություն, այն պարագայում, երբ «Աղքատության ընդլայնված ինդեքսը» 2026-ի փետրվարին, գրանցելով զգալի աճ, հասել է 115.99-ի:
Գնաճը հատկապես զգացվում է սննդամթերքի դեպքում, ինչը նվազեցնում է ցածր եկամուտ ունեցող խավի գնողունակությունը։ Տնտեսական վերլուծությունները կանխատեսում են, որ իրավիճակը կարող է էլ ավելի վատանալ՝ բարձր գնաճի և գործազրկության ֆոնին։ 2026-ի մարտի դրությամբ գործազուրկների թիվը գերազանցել է 12 միլիոնը։ Միևնույն ժամանակ, շուրջ 43.8 մլն քաղաքացի ունի վարկային պարտավորություններ, իսկ յուրաքանչյուր 2-րդը՝ վարկային քարտի պարտք (Overdraft)։
Ֆինանսական ճնշումը շարունակում է աճել նաև կենսապահովման մակարդակում․ նվազագույն աշխատավարձը կազմում է 28.075 (625$) լիրա, մինչդեռ միայնակ աշխատողի կենսապահովման նվազագույն ծախսը հասնում է 42.585 (949$) լիրայի։ Նշենք նաև, որ աղքատության շեմը գերազանցել է 106.000 (2.363$), իսկ սովի շեմը՝ 32.792 (շուրջ 731$) լիրան։
Թուրքական մեդիայում թեմայի վերաբերյալ շրջանառվող լուրերում շեշտադրվում է հետևյալը. «Մինչ պալատը (նախագահականը – խմբ.) հարմարավետության մեջ է, քաղաքացիների շրջանում աղքատությունն աճում է»:
Աղբյուր՝ Kronos
