Չինական էլեկտրամոբիլների հսկա համարվող «BYD» ընկերությունը հայտարարել է, որ Եվրոպայում իր առաջին գործարանի արտադրությունը կմեկնարկի այս տարի: Նշվել է, որ ընկերությունն իր առաջնահերթությունը տվել է Հունգարիային, իսկ Թուրքիայում նախատեսված 1 միլիարդ դոլար արժողությամբ ներդրումային ծրագիրը՝ կասեցրել։
«BYD»-ի փոխնախագահ Ստելլա Լին «Reuters» լրատվական գործակալությանը տված հարցազրույցում նշել է, որ Հունգարիայի Սեգեդ քաղաքում կառուցվող գործարանն այժմ իրենց թիվ մեկ առաջնահերթությունն է, իսկ երկրորդը՝ Եվրոպայում 2-րդ գործարանի հիմնումը:
Նշենք, որ ընկերությունը դեռևս 2024-ին պաշտոնապես հայտարարել էր Թուրքիայում 1 մլրդ դոլար արժողությամբ գործարան հիմնելու մասին, որի արտադրությունը պետք է մեկնարկեր 2026-ին։ Սակայն Ստելլա Լին հաստատել է, որ Թուրքիայում գործարանի շինարարությունը դեռ չի էլ սկսվել, և նախագիծը ներկայումս սառեցված է։ Թե երբ ընկերությունը կվերադառնա թուրքական շուկայում արտադրություն սկսելու գաղափարին, հստակ չի նշվում։
Աղբյուր՝ Donanim Haber
