ԱՄՆ-ի կողմից սահմանված նոր մաքսատուրքերը լուրջ մտահոգություններ են առաջացրել Թուրքիայի արտահանողների շրջանում: Թուրքական ապրանքների վրա կիրառվող 12․5% լրացուցիչ մաքսատուրքը հարվածում է հատկապես տեքստիլի, հագուստի և ձիթայուղի արտադրության ոլորտներին՝ առավելություն տալով ասիական և եվրոպական մրցակիցներին։
«Էգեյան ծովի ձիթապտղի և ձիթայուղի արտահանողների միության» (EZZİB) նախագահ Մեհմեդ Էմրե Ույգունը հայտնել է, որ 2026-ի առաջին 7 ամսում դեպի ԱՄՆ ձիթայուղի արտահանման ծավալը նվազել է 57%-ով՝ հասնելով 4974 տոննայի, իսկ արժեքային արտահայտությամբ 54%-ով՝ հասնելով 21․8 մլն դոլարի։
Ույգունի խոսքով՝ Եվրամիության (ԵՄ) երկրների (Իտալիա, Իսպանիա) նկատմամբ կիրառվում է 10% մաքսատուրք, իսկ Թունիսն ընդհանրապես ազատված է լրացուցիչ տուրքերից: Սա թուրքական արտադրանքի համար ստեղծում է անհավասար պայմաններ, ինչի հետևանքով Թուրքիան ռիսկի տակ է դնում ԱՄՆ շուկայում տարիներով ձեռք բերված դիրքերը:
Արտահանողները Թուրքիայի առևտրի նախարարությանը կոչ են անում դիվանագիտական քայլեր ձեռնարկել Վաշինգտոնի հետ տուրքերի տարբերությունը վերացնելու համար, ինչպես նաև վերականգնել արտահանման պետական աջակցության ծրագրերը:
«Գյուղատնտեսական ապրանքների վաճառքի կոոպերատիվների միություն» (TARİŞ) տնօրենների նախագահ Ֆիքրեթ Աքովան նշել է, որ ԱՄՆ-ի որոշումն «անընդունելի» է և լուրջ հարված է հասցնելու առանց այն էլ դժվարին վիճակում գտնվող արտահանողներին: Նա ընդգծել է, որ ինքնարժեքի բարձրացման պատճառով արտադրողին պաշտպանելու համար Թուրքիայի ֆինանսների նախարարությունից պահանջել են յուրաքանչյուր կիլոգրամ ձիթայուղի համար տրամադրել 50 թուրքական լիրա (1.05 դոլար) պետական աջակցություն:
Աղբյուր՝ Cumhuriyet
