Թուրքիայի էներգետիկայի և բնական պաշարների նախարար Ալփարսլան Բայրաքթարը հայտարարել է Սաուդյան Արաբիայի հետ էլեկտրաէներգիայի հաղորդման նոր նախագծի շուրջ ընթացող բանակցությունների մասին։ Ծրագրի համաձայն՝ Սաուդյան Արաբիայում արտադրվող էլեկտրաէներգիան Հորդանանի և Սիրիայի տարածքով պետք է հասցվի Թուրքիա։ Հետագայում հնարավոր է նաև Լիբանանի ներգրավումը նախագծում։
Այս նախագծի իրականացմամբ Ծոցի երկրների, Արևելյան Միջերկրականի և Թուրքիայի միջև կձևավորվի էլեկտրաէներգիայի առևտրի նոր միջանցք, ինչը թույլ կտա երկրներին ավելցուկային էներգիան փոխանակել միմյանց հետ։ Թուրքիան նպատակ ունի ամրապնդել իր դիրքերը որպես տարածաշրջանային էներգետիկ առևտրի կենտրոն՝ օգտագործելով իր ենթակառուցվածքները և աշխարհագրական դիրքը։
Սիրիան այս նախագծում կարևոր տարանցիկ կետ է լինելու։ Ներկայումս աշխատանքներ են տարվում մոտ 500 մեգավատ հզորությամբ Բիրեջիք-Հալեպ գիծը վերագործարկելու ուղղությամբ։ Բացի այդ, ծրագրվում է ադրբեջանական բնական գազը Քիլիսի միջոցով հասցնել Սիրիա՝ Հալեպի էլեկտրակայանում հոսանք արտադրելու համար։ Երկարաժամկետ նպատակների թվում է նաև Նախիջևանով Ադրբեջանի և Միջին Ասիայի հետ կապ հաստատելը՝ ստեղծելով էլեկտրաէներգիայի հզոր ցանց Միջին Ասիայից մինչև Եվրոպա։
Աղբյուր՝ Dünya
