Թուրքիայի նախագահ Ռեջեփ Թայիփ Էրդողանն ուղերձ է հղել Միավորված ազգերի կազմակերպության (ՄԱԿ) Մարդու իրավունքների համընդհանուր հռչակագրի ընդունման 77-ամյակի և դեկտեմբերի 10-ի՝ Մարդու իրավունքների օրվա կապակցությամբ։ Էրդողանը նշել է, որ հռչակագրի կանոններն ու սկզբունքները խախտվում են աշխարհի շատ մասերում ու ընդգծել, որ խաղաղության և արդարության հասկացություններն անընդհատ զիջում են իրենց դիրքերը։
Անդրադառնալով Գազայում տեղի ունեցող իրադարձություններին՝ Էրդողանը նշել է, որ չնայած միջազգային հանրության բոլոր ջանքերին, վայրագությունները շարունակվում են: Ըստ նրա՝ դա հստակ ցույց է տալիս, որ Մարդու իրավունքների համընդհանուր հռչակագրում նշված արժեքները լրջորեն վնասվել են: Թուրքիայի նախագահը նշել է նաև, որ Գազայի վերականգնումն ողջ մարդկության համատեղ պատասխանատվությունն է պաղեստինցիների նկատմամբ:
Մշակութային ռասիզմի, իսլամաֆոբիայի և քսենոֆոբիայի դեմ պայքարը կենսական նշանակություն ունի հռչակագրում նշված սկզբունքները պահպանելու համար։ Էրդողանի պնդմամբ՝ Թուրքիան կշարունակի պաշտպանել մարդու իրավունքներն ու արժանապատվությունն ամբողջ աշխարհում՝ առանց լեզվի, ռասայի կամ ծագման հիման վրա խտրականության, հատկապես մշակութային ոլորտում, և ամենաբարձր մակարդակով նպաստել համաշխարհային խաղաղությանը և անվտանգությանը։
Էրդողանն անդրադարձել է նաև ահաբեկչությանը և նշել, որ իրենց նպատակն է հասնել առանց ահաբեկչության Թուրքիայի և ահաբեկչությունից զերծ տարածաշրջանի իդեալին, որը կենտրոնացած է զարգացման, համերաշխության, համագործակցության ու խաղաղության վրա։
Աղբյուր՝ TRT Haber
