Թուրքիայի կողմից ահաբեկչական ճանաչված «Քուրդիստանի բանվորական կուսակցությունը» (ՔԲԿ-PKK) հայտնել է, որ իր ուժերը դուրս է բերել Իրաքյան Քուրդիստանի սահմանին գտնվող Զափ ճամբարից։ ՔԲԿ-ի հայտարարության մեջ նշվում է, որ նոյեմբերի 16-ին մինչ այդ «բախման ռիսկ ստեղծող ուժերը» տեղափոխվել են այլ վայրեր, արդյունքում այդ հատվածում բախման ռիսկն իսպառ վերացել է։
«ՔԲԿ»-ն այս քայլը որակել է որպես «խաղաղություն և ժողովրդավարական հասարակություն» գործընթացին աջակցող քայլ՝ ընդգծելով, որ շարունակում է իր քաղաքական որոշման նկատմամբ հավատարմությունը։ Կուսակցությունը վստահություն է հայտնել, որ այս քայլը կնպաստի «քրդական հարցի լուծմանը և Թուրքիայի ժողովրդավարականացման գործընթացին»։
Ավելի վաղ «ՔԲԿ»-ն արդեն հայտարարել էր Թուրքիայի տարածքից դուրս գալու որոշման մասին։ Բանտարկյալ առաջնորդ Աբդուլլահ Օջալանի 2025-ի փետրվարյան կոչից հետո կուսակցությունը մայիսին ընդունել էր զինաթափման որոշում, իսկ հուլիսին Սուլեյմանիյեում կայացած խորհրդանշական արարողությամբ պաշտոնապես հայտարարել զենքերը վայր դնելու մասին։ Նույն գործընթացի շրջանակում հոկտեմբերին կազմակերպության որոշ ստորաբաժանումներ արդեն տեղափոխվել էին Իրաքյան Քուրդիստանի տարածք։
Աղբյուր՝ DW
